സര്ക്കാരിനെ സമ്മര്ദ്ദത്തിലാക്കി ഓര്ത്തഡോക്സ് സഭയുടെ മുന്നറിയിപ്പ്
തിരുവനന്തപുരം: സുപ്രീംകോടതി വിധി നടപ്പാക്കേണ്ട നിയമബാധ്യത സംസ്ഥാന സര്ക്കാരിനുണ്ടെന്ന് ഓര്മ്മിപ്പിച്ച് ഓര്ത്തഡോക്സ് സഭയുടെ മുന്നറിയിപ്പ് കത്ത്. ചീഫ് സെക്രട്ടറിക്കാണ് ഓര്ത്തഡോക്സ് സഭ സെക്രട്ടറി കത്തയച്ചിരിക്കുന്നത്. സര്ക്കാരിനെതിരെ കോടതിയലക്ഷ്യ ഹര്ജി നല്കുന്നതിന് മുന്നോടിയായുള്ള നീക്കമാണിതെന്ന് സൂചനയുണ്ട്. മലങ്കര സഭാ തര്ക്കം പരിഹരിക്കാന് മന്ത്രിസഭ ഉപസമിതി നാളെ ചര്ച്ച നടത്താനിരിക്കെയാണ് ഓര്ത്തഡോക്സ് സഭ സര്ക്കാരിന് മുന്നറിയിപ്പ് നല്കിയിരിക്കുന്നത്. പള്ളിത്തര്ക്കങ്ങളില് തങ്ങള്ക്കനുകൂലമായി സുപ്രീംകോടതി വിധി പുറപ്പെടുവിച്ചിട്ടും അതിനനുസരിച്ച് നടപടിയെടുക്കാത്ത സര്ക്കാര് നിലപാടില് ഓര്ത്തഡോക്സ് സഭ പ്രതിഷേധത്തിലാണ്.