വടകരയിൽ മുല്ലപ്പള്ളി മത്സരിക്കണമെന്ന് ആവശ്യം
ന്യൂഡൽഹി: വടകരയിൽ സ്ഥാനാർഥി നിർണയത്തിൽ അവ്യക്തത തുടരുന്നതിനിടെ മുല്ലപ്പള്ളി രാമചന്ദ്രനു മേൽ സമ്മർദം ശക്തമാകുന്നു. വടകരയില്‍ രാഷ്ട്രീയപോരാട്ടം വേണമെന്നാണ് പാർട്ടിയിലെ പൊതുവികാരം. അതുകൊണ്ട് മുല്ലപ്പള്ളി തന്നെ മത്സരിക്കണമെന്ന ആവശ്യവുമായി മലബാറിലെ മറ്റു യുഡിഎഫ് സ്ഥാനാര്‍ഥികളും വി.എം.സുധീരൻ ഉൾപ്പെടെയുള്ള നേതാക്കളും രംഗത്തെത്തി. ഇതിനെത്തുടർന്നു മുല്ലപ്പള്ളി കേരളത്തിലേക്കുള്ള മടക്കയാത്ര മാറ്റി.
കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി മുകുള്‍ വാസ്നിക് മുല്ലപ്പള്ളി രാമചന്ദ്രനുമായി ചർച്ച നടത്തി. മത്സരിക്കാനില്ലെന്ന നിലപാട് മുല്ലപ്പള്ളി ആവർത്തിച്ചുവെന്നാണു വിവരം. മുല്ലപ്പള്ളി മത്സരിക്കണമെന്ന് ആവശ്യപ്പെട്ടുള്ള സന്ദേശം എഐസിസി, കെപിസിസി നേതൃത്വത്തിനു നേതാക്കളും പ്രവർത്തകരും അയച്ചിരുന്നു. വടകരയിൽ ദുർബലരായ സ്ഥാനാർഥികളെ നിർത്തരുതെന്ന് കോൺഗ്രസ് കേന്ദ്ര നേതൃത്വത്തോട് ആർഎംപിയും ആവശ്യപ്പെട്ടിട്ടുണ്ട്.