‘കോടതി മുറിയില് നീതിദേവത അരുംകൊലചെയ്യപ്പെട്ട ദിവസം’: സിസ്റ്റര് ലൂസികളപ്പുര
കോട്ടയം: കന്യാസ്ത്രീയെ ലൈംഗികമായി പീഡിപ്പിച്ച കേസില് ബിഷപ്പ് ഫ്രാങ്കോ മുളയ്ക്കലിനെ കുറ്റവിമുക്തനാക്കിയ കോടതി വിധിയില് പ്രതികരണവുമായി സിസ്റ്റര് ലൂസി കളപ്പുര.
കോടതി മുറിക്കുളളില്വച്ച് നീതിദേവത അരുംകൊലചെയ്യപ്പെട്ട ദിവസം എന്നായിരുന്നു സിസ്റ്റര് ഫേസ്ബുക്കില് കുറിച്ചത്.
കുറ്റം ചെയ്തെന്ന് തെളിയിക്കാന് പ്രോസിക്യൂഷന് പരാജയപ്പെട്ടെന്ന് വ്യക്തമാക്കികൊണ്ടാണ് ബിഷപ്പ് ഫ്രാങ്കോ മുളക്കലിനെ കോടതി കുറ്റവിമുക്തനാക്കിയത്. കോട്ടയം അഡീഷണല് സെഷന്സ് കോടതി ജഡ്ജി ജി. ഗോപകുമാര് ആണ് വിധി പറഞ്ഞത്. വിധി കേള്ക്കാന് ബിഷപ്പ് ഫ്രാങ്കോ മുളയ്ക്കല്, ഫിലിപ്പ്, ചാക്കോ എന്നീ സഹോദരന്മാര്ക്കൊപ്പം കോടതിയില് എത്തിയിരുന്നു. പബ്ലിക് പ്രോസിക്യൂട്ടര് അഡ്വ. ജിതേഷ് ജെ ബാബു, അന്വേഷണ ഉദ്യോഗസ്ഥരായിരുന്ന ഡിവൈഎസ്പി കെ സുഭാഷ്, എസ്ഐ മോഹന്ദാസ് എന്നിവരും കോടതിയില് ഹാജരായിരുന്നു. വിധികേട്ട് കോടതിമുറിയില് നിന്ന് പുറത്തിറങ്ങിയ ഫ്രാങ്കോ അഭിഭാഷകരെയടക്കം കെട്ടിപ്പിടിച്ച് പൊട്ടിക്കരഞ്ഞു. ദൈവത്തിന് സ്തുതിയെന്ന് മാത്രമായിരുന്നു ബിഷപ്പിന്റെ പ്രതികരണം