ശബരിമല സമരത്തില് ദേശീയ നേതൃത്വം ഇടപെടുന്നു; മുഖ്യമന്ത്രിയെയും മന്ത്രിമാരെയും വഴിയില് തടയുമെന്ന് ബിജെപി
ദില്ലി: ശബരിമല സമരത്തില് ബിജെപി ദേശീയ നേതൃത്വം ഇടപെടുന്നു. സമരം മയപ്പെടുത്തിയതില് അതൃപ്തി അറിയിച്ച ദേശീയ നേതൃത്വം സമരം ശക്തമാക്കാന് സംസ്ഥാന നേതൃത്വത്തോട് നിര്ദ്ദേശിച്ചു. സമരം ശക്തമാക്കുന്നതിന്റെ ഭാഗമായി മുഖ്യമന്ത്രിയെയും മന്ത്രിമാരെയും വഴിയില് തടയാന് സംസ്ഥാന നേതൃത്വം തീരുമാനിച്ചു. ബിജെപി സംസ്ഥാന ജന. സെക്രട്ടറിമാരായ എം ടി രമേശ്, എ എന് രാധാകൃഷ്ണന് എന്നിവരുടെ വാര്ത്താ സമ്മേളനത്തിന് പിന്നിലും കേന്ദ്ര ഇടപെടലുണ്ടായി.
കെ സുരേന്ദ്രനെതിരെ കള്ളക്കേസുകള് എടുത്ത് പീഡിപ്പിക്കന്നതിനെതിരെ മുഖ്യമന്ത്രിമാരെയും മന്ത്രിമാരെയും വഴിയില് തടയുമെന്ന് ബിജെപി വ്യക്തമാക്കി. കേന്ദ്ര നേതാക്കള് എത്തുന്നതോടെ സമരത്തിന് ദേശീയ പരിപ്രേക്ഷ്യം ഉണ്ടാകുമെന്നും ബിജെപി സംസ്ഥാന ജനറല് സെക്രട്ടറി എം ടി രമേശ് വാര്ത്താ സമ്മേളനത്തില് പറഞ്ഞു. ശബരിമലയില് ദര്ശനത്തിന് സൗകര്യമുണ്ടാക്കുന്ന ഹൈക്കോടതി സമിതിയുടെ നിര്ദേശങ്ങള് സ്വാഗതം ചെയ്യും. ഹൈക്കോടതിയുടെ സമിതിയുണ്ടായാലും ആചാരം സംരക്ഷിക്കാന് ബിജെപി ഭക്തര്ക്കൊപ്പമുണ്ടാകുമെന്നും എം ടി രമേശ് വ്യക്തമാക്കി.