ഡിവൈഎഫ്ഐ ജില്ലാ നേതൃത്വത്തിനെതിരെ മുന്നറിയിപ്പുമായി ആകാശ് തില്ലങ്കേരി
കണ്ണൂര്: ഡിവൈഎഫ്ഐ ജില്ലാ നേതൃത്വത്തിനെതിരെ മുന്നറിയിപ്പുമായി ആകാശ് തില്ലങ്കേരി. ഡിവൈഎഫ്ഐ ജില്ലാ സെക്രട്ടറി ഇല്ലാക്കഥകള് പ്രചരിപ്പിക്കുകയാണ്. ഇത് തുടര്ന്നാല് പരസ്യമായി പ്രതികരിക്കേണ്ടി വരുമെന്നാണ് ആകാശ് തില്ലങ്കേരി വ്യക്തമാക്കിയിരിക്കുന്നത്. തന്റെ ഫേസ്ബുക്കില് പങ്കുവെച്ച ഒരു പോസ്റ്റിന് താഴെ വന്ന കമ്മന്റിന് മറുപടിയായിട്ടാണ് ആകാശ് തില്ലങ്കേരി ഇക്കാര്യം വ്യക്തമാക്കുന്നത്. തന്നെ ഒറ്റ ദിവസം കൊണ്ട് ഒറ്റുകാരനായി ചിത്രീകരിക്കുകയാണ്. ഇതുപോലുള്ള നുണപ്രചാരണങ്ങള് ശ്രദ്ധയില് പെടുത്തിയിട്ടും അവര് തിരുത്താന് തയ്യാറല്ലെങ്കില് എനിക്കും പരസ്യമായി പ്രതികരിക്കേണ്ടി വരുമെന്നും ആകാശ് തില്ലങ്കേരി വ്യക്തമാക്കുന്നു. ആകാശ് തില്ലങ്കേരിയുടെ കുറിപ്പിന്റെ പൂര്ണ്ണ രൂപം ഇങ്ങനെ:
യുവജന സംഘടനയിലെ ഉത്തരവാദപ്പെട്ടവര് തന്നെ ഫേസ്ബുക്ക് പോസ്റ്റിലൂടെ സഖാവ് ബാബുവേട്ടന്റെ കൊലയാളികളുടെ കൂടെ കൊട്ടേഷന് നടത്തി എന്ന് ധ്വനിപ്പിച്ചു പോസ്റ്റുകള് ഇടുമ്ബോള് ആരായാലും ഇതേപോലെ പ്രതികരിച്ചു പോകും. അതൊരുതരം വൈകാരികത ഇളക്കി വിടലാണ്. ബോധപൂര്വ്വം അത് നിര്മ്മിച്ചെടുത്തത് ആണ്. എന്നെ അടുത്തറിയുന്നവര് അത് വിശ്വസിക്കില്ലെങ്കിലും പറയുന്നത് ഡി വൈ എഫ് ഐ ജില്ലാ സെക്രട്ടറി ആവുമ്ബോള് അതില് ആധികാരികത ഉണ്ടെന്ന് അവര് ധരിച്ചുപോകും.
അങ്ങിനെ രക്തസാക്ഷികളെ ഒറ്റുകൊടുത്തവര് ആരാണെങ്കിലും അവരുടെ പേരുപറഞ്ഞു തന്നെ തുറന്നുകാട്ടണം..ഞാന് വെല്ലുവിളിക്കുന്നു ആ പ്രചാരണം എന്റെ പേരില് അഴിച്ചുവിടുന്നവരെ. ഞാനത് ചെയ്തെന്ന് നിങ്ങള് തെളിയിക്കുമെങ്കില് ഞാന് തെരുവില് വന്ന് നില്ക്കാം,നിങ്ങളെന്നെ കല്ലെറിഞ്ഞു കൊന്നോളൂ. അതില് കുറഞ്ഞ ശിക്ഷ ഒന്നും പാര്ട്ടിയെ ഒറ്റുകൊടുത്തവന് കല്പ്പിക്കാന് ഇല്ല. ഇതുപോലുള്ള നുണപ്രചാരണങ്ങള് ശ്രദ്ധയില് പെടുത്തിയിട്ടും അവര് തിരുത്താന് തയ്യാറല്ലെങ്കില് എനിക്കും പരസ്യമായി പ്രതികരിക്കേണ്ടി വരും.
പാര്ട്ടി ഷുഹൈബ് കേസില് പ്രതിചേര്ക്കപെട്ടപ്പോള് എന്നെ പുറത്താക്കിയതാണ്. അത് എനിക്കും നിങ്ങള്ക്കും പാര്ട്ടിക്കും എല്ലാവര്ക്കും ബോധ്യമുള്ള കാര്യമാണ്. അന്ന് മുതല് ഞാന് ചെയ്യുന്ന ഏതൊരു കാര്യത്തിലും പാര്ട്ടിക്ക് ഉത്തരവാദിത്വമേല്ക്കേണ്ട ബാധ്യത ഇല്ല. അതൊരു വസ്തുതയാണ്. എന്നുകരുതി ഒറ്റരാത്രികൊണ്ട് ഒറ്റുകാരനാക്കുന്ന പ്രവണത പാര്ട്ടിയെ സ്നേഹിക്കുന്ന ഒരു വ്യക്തി എന്ന നിലയില് എനിക്ക് അംഗീകരിക്കാന് കഴിയില്ല.