നേതൃമാറ്റത്തില്‍ പരസ്യമായി അതൃപ്തി പ്രകടിപ്പിച്ച്‌ ഉമ്മന്‍‌ചാണ്ടി
ന്യൂഡല്‍ഹി: കോണ്‍ഗ്രസിന്റെ നേതൃമാറ്റത്തില്‍ അതൃപ്തി പ്രകടിപ്പിച്ച്‌ ഉമ്മന്‍‌ചാണ്ടി. കേരളത്തിലെ നേതൃമാറ്റം നല്ല രീതിയില്‍ ആകാമായിരുന്നുവെന്നും അത്‌ രാഹുല്‍ഗാന്ധിയുമായി സംസാരിച്ചിട്ടുണ്ടെന്നും ഉമ്മന്‍ ചാണ്ടി മാധ്യമങ്ങളോട് പറഞ്ഞു.
കെ പി സി സി അദ്ധ്യക്ഷനെയും പ്രതിപക്ഷ നേതാവിനെയുമെല്ലാം തീരുമാനിക്കുന്നത് കോണ്‍ഗ്രസ് ഹൈക്കമാന്‍ഡിന്‍റെ അധികാരപരിധിയില്‍പ്പെട്ട കാര്യങ്ങളാണെന്ന് അദ്ദേഹം അഭിപ്രായപ്പെട്ടു. ഹൈക്കമാന്‍ഡിന്‍റെ തീരുമാനം അംഗീകരിക്കാന്‍ എല്ലാവരും ബാധ്യസ്ഥരാണെന്നും, അദ്ദേഹം പറഞ്ഞു.
‘കേരളത്തിലെ നേതൃമാറ്റം നല്ല രീതിയില്‍ ആകാമായിരുന്നു എന്ന അഭിപ്രായം തനിക്കുണ്ട്. ഇക്കാര്യം രാഹുല്‍ഗാന്ധിയോട് പറഞ്ഞു. എന്നാല്‍ ഹൈക്കമാന്‍ഡ് എടുത്ത തീരുമാനത്തില്‍ എതിര്‍പ്പില്ല. നിയമിക്കപ്പെട്ട ആളുകളോടും എതിര്‍പ്പില്ല. അതെല്ലാം എല്ലാവരും അംഗീകരിക്കുന്നു. കാര്യങ്ങളെല്ലാം രാഹുല്‍ ഗാന്ധിയോട് സംസാരിച്ചു. കോണ്‍ഗ്രസ് ഒറ്റക്കെട്ടായി മുന്നോട്ടുപോവുമെന്നും’ ഉമ്മന്‍ ചാണ്ടി പറഞ്ഞു.