പാലാ നഗരസഭയിലെ യു.ഡി.എഫിലെ സീറ്റ് വിഭജനം പൂര്‍ത്തിയായി
പാലാ: നഗരസഭയിലെ യു.ഡി.എഫിലെ സീറ്റ് വിഭജനം പൂര്‍ത്തിയായി. എല്‍.ഡി.എഫില്‍ ചര്‍ച്ച തുടരുകയാണ്. യു.ഡി.എഫില്‍ ആകെയുള്ള 26 സീറ്റുകളില്‍ 13 സീറ്റുകളില്‍ വീതം കോണ്‍ഗ്രസും കേരള കോണ്‍ഗ്രസ്-ജോസഫ് വിഭാഗവും മത്സരിക്കും. കോണ്‍ഗ്രസ് സംസ്ഥാന നേതൃത്വത്തിെന്‍റ പ്രത്യേക നിര്‍ദേശപ്രകാരം കെ.പി.സി.സി വൈസ് പ്രസിഡന്‍റ് ജോസഫ് വാഴക്കന്‍, ജനറല്‍ സെക്രട്ടറി ടോമി കല്ലാനി എന്നിവര്‍ മുന്‍കൈയെടുത്താണ് പാലാ നഗരസഭയിലെ യു.ഡി.എഫ് സീറ്റ് വിഭജനം പൂര്‍ത്തിയാക്കിയത്.
പാലാ നഗരസഭയില്‍ കേരള കോണ്‍ഗ്രസ്-ജോസ് പക്ഷത്തുനിന്ന് ജോസഫ് വിഭാഗത്തിലെത്തിയ മുന്‍ ചെയര്‍മാനും ഇപ്പോഴത്തെ വൈസ് ചെയര്‍മാനുമായിരുന്ന കുര്യാക്കോസ് പടവെന്‍റ നേതൃത്വത്തിലാണ് ഐക്യജനാധിപത്യ മുന്നണി ഇപ്രാവശ്യം മത്സരരംഗത്തുള്ളത്. മൂന്നുദിവസത്തിനകം വാര്‍ഡുകളിലെ സ്ഥാനാര്‍ഥിനിര്‍ണയം പൂര്‍ത്തിയാക്കുമെന്ന് കുര്യാക്കോസ് പടവനും കോണ്‍ഗ്രസ് ബ്ലോക്ക് പ്രസിഡന്‍റ് പ്രഫ. സതീഷ് ചൊള്ളാനിയും സംയുക്ത പ്രസ്താവനയില്‍ അറിയിച്ചു.