കേരള ബാങ്ക് ഭരണസമിതി തെരഞ്ഞെടുപ്പ്: സ്റ്റേ തുടരും
കൊച്ചി: കേരള ബാങ്ക് ഭരണസമിതി തെരഞ്ഞെടുപ്പ് സ്റ്റേ ചെയ്ത സിംഗിള് െബഞ്ച് ഉത്തരവ് തുടരും. ഉത്തരവ് ചോദ്യം ചെയ്ത് കേരള ബാങ്കും സംസ്ഥാന സഹകരണ തെരഞ്ഞെടുപ്പ് കമീഷനും നല്കിയ അപ്പീല് ഹരജിയില് ഡിവിഷന് ബെഞ്ച് ഇടപെട്ടില്ല.
സെപ്റ്റംബര് 25ലെ തെരഞ്ഞെടുപ്പ് സ്റ്റേ ചെയ്ത ഉത്തരവ് വസ്തുതകള് വിലയിരുത്താതെയാണെന്നും റദ്ദാക്കണമെന്നും ആവശ്യപ്പെട്ട് നല്കിയ ഹരജിയാണ് ജസ്റ്റിസ് സി.ടി. രവികുമാര്, ജസ്റ്റിസ് കെ. ഹരിപാല് എന്നിവരടങ്ങുന്ന ഡിവിഷന് െബഞ്ച് പരിഗണിച്ചത്. തെരഞ്ഞെടുപ്പുമായി ബന്ധപ്പെട്ട ഹരജികള് സമയബന്ധിതമായി തീര്പ്പാക്കാന് സിംഗിള് ബെഞ്ചിന് നിര്ദേശവും നല്കി.
തെരഞ്ഞെടുപ്പ് വിജ്ഞാപനം റദ്ദാക്കണമെന്നാവശ്യപ്പെട്ട് കുറുവട്ടൂര് സര്വിസ് സഹകരണ ബാങ്ക് ചെയര്മാന് എന്. സുബ്രഹ്മണ്യന് ഉള്പ്പെടെ നല്കിയ ഹരജിയിലാണ് മൂന്നാഴ്ചത്തേക്ക് സ്റ്റേ അനുവദിച്ച് ആഗസ്റ്റ് 26ന് സിംഗിള് ബെഞ്ച് ഉത്തരവുണ്ടായത്.