എസ്.ബി.ഐ മിനിമം ബാലന്സ് പിഴയും എസ്.എം.എസ് ചാര്ജും ഒഴിവാക്കി
മുംബൈ: സേവിങ്സ് അക്കൗണ്ടുകളില് മിനിമം ബാലന്സ് സൂക്ഷിക്കാത്തതിന്റെ പേരിലുള്ള പിഴയും എസ്.എം.എസ്. നിരക്കുകളും പൂര്ണമായി ഒഴിവാക്കി എസ്.ബി.ഐ. ട്വിറ്ററിലൂടെയാണ് ബാങ്ക് ഇക്കാര്യം അറിയിച്ചത്. ബാങ്കിന്റെ 44 കോടി വരുന്ന സേവിങ്സ് അക്കൗണ്ടുടമകള്ക്ക് ഇതിന്റെ പ്രയോജനം ലഭിക്കും.
ഇന്റര്നെറ്റ് ബാങ്കിങ്ങും ചെക്ബുക്ക് സംവിധാനവുമുള്ള എല്ലാ സേവിങ്സ് അക്കൗണ്ടുകള്ക്കും പുതിയ ഇളവ് ഉണ്ടോ എന്ന ചോദ്യവുമായി ട്വീറ്റിന് താഴെ എത്തിയവര്ക്ക് എല്ലാ അക്കൗണ്ടുകള്ക്കും ബാധകമാണെന്ന മറുപടിയാണ് എസ്.ബി.ഐ നല്കിയിരിക്കുന്നത്. അതേസമയം, സേവിങ്സ് അക്കൗണ്ടുകളില് ഒരു ലക്ഷവും അതിന് മുകളിലും ബാലന്സ് സൂക്ഷിക്കുന്നവര്ക്ക് എത്ര തവണവേണമെങ്കിലും എ.ടി.എം ട്രാന്സാക്ഷന് നടത്താമെന്ന ഓഫറും എസ്.ബി.െഎ മുന്നോട്ടുവെക്കുന്നുണ്ട്.
സേവിംഗ്സ് അക്കൗണ്ടുകളില് മിനിമം ബാലന്സ് സൂക്ഷിക്കാതിരുന്നാലുള്ള പിഴ ഒഴിവാക്കാന് കഴിഞ്ഞ മാര്ച്ച് മാസത്തില് തന്നെ എസ്.ബി.ഐ തീരുമാനിച്ചിരുന്നു. മെട്രോ നഗരങ്ങളില് ചുരുങ്ങിയത് 3000 രൂപയും അര്ദ്ധനഗരങ്ങളില് 2000 രൂപയും ഗ്രാമങ്ങളില് 1000 രൂപയും മിനിമം ബാലന്സ് വേണമെന്നായിരുന്നു നിര്ദേശം. ഇതു പാലിക്കാതിരുന്നാല് അഞ്ചു രൂപ മുതല് 15 രൂപ വരെയായിരുന്നു പിഴ.