രാജ്യം മുഴുവന് ബഹുരാഷ്ട്ര കുത്തകകള്ക്കും വന്കിട മുതലാളിമാര്ക്കും തുറന്നിട്ടു കൊടുക്കുകയാണ് കേന്ദ്രത്തിന്റെ ഉദ്ദേശം: കോടിയേരി
തിരുവനന്തപുരം: രാജ്യത്തിന്റെ എല്ലാ മേഖലകളും കുത്തകകള്ക്കും വന്കിട മുതലാളിമാര്ക്കും തുറന്നിട്ടു കൊടുത്ത് കോര്പ്പറേറ്റ്വല്കരണം ശക്തിപ്പെടുത്തുകയാണ് കേന്ദ്രസര്ക്കാരിന്റെ ലക്ഷ്യമെന്ന് സി പി എം സംസ്ഥാന സെക്രട്ടറി കോടിയേരി ബാലകൃഷ്ണന്.
ധാതുസമ്ബത്തുകള് പോലും സ്വകാര്യമേഖലയ്ക്ക് കൈമാറുന്ന നയം കേന്ദ്രസര്ക്കാര് സ്വീകരിച്ചു കഴിഞ്ഞു. വിമാനത്താവളങ്ങളും റെയില്വേയും എല്ലാം സ്വകാര്യമേഖലയെ ഏല്പിക്കുകയെന്ന നയത്തിലാണ് കേന്ദ്രം എത്തിയിരിക്കുന്നതെന്നും തിരുവവന്തപുരത്ത് നടത്തിയ വാര്ത്താ സമ്മേളനത്തില് കോടിയേരി വിമര്ശിച്ചു.
ആദിവാസി മേഖലകളില് പദ്ധതികള് ആരംഭിക്കുമ്ബോള്, ആദിവാസി ജനസമൂഹം അധിവസിക്കുന്ന എസ്.ടി. പഞ്ചായത്തുകളുടെ അനുമതി വാങ്ങണം എന്ന നിബന്ധന എടുത്തുകളഞ്ഞിരിക്കുകയാണ്. വനമേഖലയില് ഉള്പ്പെടെ ഏതു സംരംഭവും ആരംഭിക്കുമ്ബോള് പാരിസ്ഥിതിക പഠനം ആവശ്യമില്ല എന്ന കേന്ദ്രസര്ക്കാരിന്റെ ഈ ഉത്തരവ് വലിയതോതില് പരിസ്ഥിതി സംരക്ഷണത്തിന് കോട്ടമുണ്ടാക്കുന്നതാണ്.
കേന്ദ്രത്തിന്റെ ഈ ഉത്തരവ് തിരുത്തുന്നതിനായി സംസ്ഥാന സര്ക്കാര് ഇടപെടണമെന്നും കേരളത്തിന്റെ വ്യത്യസ്ത അഭിപ്രായം സംസ്ഥാന സര്ക്കാര് കേന്ദ്രസര്ക്കാരിനെ അറിയിക്കണമെന്നും കോടിയേരി ബാലകൃഷ്ണന് ആവശ്യപ്പെട്ടു.