ഗള്‍ഫില്‍നിന്ന്‌ മൂന്ന് വിമാനങ്ങള്‍കൂടി ഇന്നെത്തും
കൊച്ചി: പ്രവാസികളുമായി മൂന്ന് വിമാനങ്ങള്‍ കൂടി ഇന്ന് കേരളത്തിലെത്തും. കുവൈത്ത്-കൊച്ചി, മസ്കത്ത്- കൊച്ചി, ഖത്തര്‍- കൊച്ചി വിമാനങ്ങളാണ് ഇന്നെത്തുക. രാത്രി 9.15നാണ് കുവൈത്തില്‍നിന്നും വിമാനം എത്തുക. 200 യാത്രക്കാരാണ് വിമാനത്തിലുണ്ടാവുക. മസ്കത്ത്- വിമാനം രാത്രി 8.50നും ഖത്തര്‍- വിമാനം പുലര്‍ച്ചെ രണ്ടിനും എത്തും.
മുഴുവന്‍ യാത്രക്കാരെയും ആരോഗ്യ പരിശോധനകള്‍ക്ക് ശേഷം മുന്‍കൂട്ടി നിശ്ചയിച്ച ക്വാറന്റീന്‍ കേന്ദ്രങ്ങളിലേക്ക് മാറ്റും. ഗര്‍ഭിണികള്‍ക്കും കുട്ടികള്‍ക്കും വീടുകളില്‍ നിരീക്ഷണത്തില്‍ കഴിയാം.
പ്രവാസികളെ നാട്ടിലെത്തിക്കാനുള്ള വിമാന സര്‍വീസ് തുടങ്ങിയ ശേഷം നാല് വിമാനങ്ങളാണ് ഗള്‍ഫ് രാജ്യങ്ങളില്‍നിന്ന് കേരളത്തിലെത്തിയത്. വ്യാഴാഴ്ച അബൂദബി, ദുബൈ എന്നിവിടങ്ങളില്‍നിന്നും വെള്ളിയാഴ്ച റിയാദില്‍നിന്നും ബഹ്റൈനില്‍നിന്നും വിമാനമെത്തിയിരുന്നു. റിയാദ്, ബഹ്റൈന്‍ എന്നിവിടങ്ങളില്‍ നിന്നായി 329 പേരാണ് ശനിയാഴ്ച എത്തിയത്.