4 മാസം പ്രായമുള്ള കുഞ്ഞിനും രോഗം
തിരുവനന്തപുരം: സംസ്ഥാനത്ത് ബുധനാഴ്ച 11 പേര്‍ക്ക് കോവിഡ് സ്ഥിരീകരിച്ചതായി മുഖ്യമന്ത്രി പിണറായി വിജയന്‍ വാര്‍ത്തസമ്മേളനത്തില്‍ അറിയിച്ചു. കണ്ണൂര്‍ ഏഴ്, കോഴിക്കോട് രണ്ട്, കോട്ടയം, മലപ്പുറം എന്നിവിടങ്ങളില്‍ ഒന്ന് വീതവുമാണ് സ്ഥിരീകരിച്ചത്. പാലക്കാട്ടുള്ള ഒരാള്‍ രോഗമുക്തി നേടി.
കോഴിക്കോട് രണ്ട് ഹൗസ് സര്‍ജന്‍മാര്‍ക്കാണ് കോവിഡ് സ്ഥിരീകരിച്ചത്. ഇരുവരും കേരളത്തിന് പുറത്തുനിന്ന് ട്രെയിനില്‍ വന്നവരാണ്. ഇതില്‍ ഒരാള്‍ കണ്ണൂര്‍ ജില്ലക്കാരനാണ്. കോഴിക്കോട് ജില്ലയില്‍ രോഗം സ്ഥിരീകരിച്ച മറ്റൊരാള്‍ ആരോഗ്യ പ്രവര്‍ത്തകനാണ്. മൂന്നുപേര്‍ക്ക് സമ്ബര്‍ക്കത്തിലൂടെയാണ് രോഗം ബാധിച്ചത്. അഞ്ചുപേര്‍ വിദേശത്തുനിന്ന് വന്നവരാണ്. മലപ്പുറം ജില്ലയില്‍ രോഗം സ്ഥിരീകരിച്ചത് നാല് മാസം പ്രായമുള്ള പെണ്‍കുഞ്ഞിനാണ്. മഞ്ചേരി പയ്യനാട് സ്വദേശിയാണ് കുഞ്ഞ്. കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
കോട്ടയത്ത് രോഗം സ്ഥിരീകരിച്ചത് ആസ്ട്രേലിയയില്‍നിന്ന് വന്നയാള്‍ക്കാണ്. ഇയാള്‍ ഡല്‍ഹിയില്‍നിന്ന് ടാക്സിയിലാണ് കേരളത്തിലെത്തിയത്.
ബുധനാഴ്ച പുതുതായി 95 പേരെ ആശുപത്രിയില്‍ പ്രവേശിപ്പിച്ചു. സംസ്ഥാനത്ത് 127 പേര്‍ നിലവില്‍ ചികിത്സയിലുണ്ട്. 29,150 പേരാണ് നിരീക്ഷണത്തില്‍ കഴിയുന്നത്. കണ്ണൂരിലാണ് കൂടുതല്‍ പേര്‍ ചികിത്സയിലുള്ളത്. അവിടെ നിയന്ത്രണങ്ങള്‍ കൂടുതല്‍ കര്‍ശനമാക്കിയിട്ടുണ്ട്. െപാലീസ് പരിശോധനയും കാര്യമായി നടക്കുന്നു. അതിനാല്‍ തന്നെ വാഹനങ്ങള്‍ പുറത്തിറങ്ങുന്നത് കുറവുണ്ടെന്ന് മുഖ്യമന്ത്രി അറിയിച്ചു.