ലാവ്ലിന്‍ കേസില്‍ ഗവര്‍ണര്‍ പാലമായോ എന്ന് സംശയിക്കുന്നു :കെ. മുരളീധരന്‍
തിരുവനന്തപുരം: കേരള ഗവര്‍ണര്‍ ആരിഫ് മുഹമ്മദ് ഖാന്‍ നിയമസഭയില്‍ നടത്തിയ നയപ്രഖ്യാപന പ്രസംഗത്തില്‍ സി.എ.എ വിരുദ്ധ പരമര്‍ശങ്ങളടങ്ങിയ 18-ാം ഖണ്ഡിക വായിച്ച സംഭവത്തില്‍ മുഖ്യമന്ത്രിയേയും ഗവര്‍ണറേയും വിമര്‍ശിച്ച്‌ കെ. മുരളീധരന്‍ എം.പി. ലാവ്ലിന്‍ കേസില്‍ ഗവര്‍ണര്‍ ഒരു പാലമായി പ്രവര്‍ത്തിച്ചോ എന്ന കാര്യത്തില്‍ സംശയമുണ്ടെന്ന് കെ. മുരളീധരന്‍ പറഞ്ഞു.
നയപ്രഖ്യാപനത്തിലെ 18-ാം ഖണ്ഡിക വായിക്കില്ലെന്ന് ആദ്യം നിലപാടെടുത്ത ഗവര്‍ണര്‍, പിന്നീട് മുഖ്യമന്ത്രി അഭ്യര്‍ഥിച്ചതിനാല്‍ വായിക്കുകയായിരുന്നു. അതിനര്‍ഥം മുഖ്യമന്ത്രി ഗവര്‍ണറുമായി ഇടക്കിടെ ബന്ധപ്പെടുന്നുണ്ടെന്നാണ്.
മനുഷ്യ മഹാശൃംഖല കഴിഞ്ഞിട്ട് മുഖ്യമന്ത്രി നേരെ പോയത് രാജ്ഭവനില്‍ ഗവര്‍ണറുടെ ആതിഥ്യം സ്വീകരിക്കാനാണെന്നും അതേസമയം കേരള ഗവര്‍ണര്‍ നിയമസഭയെ അടിക്കടി അപമാനിക്കുകയാണെന്നും മുരളീധരന്‍ പറഞ്ഞു.