സഭകള് തമ്മില് മൃതദേഹം സംസ്കരിക്കുന്നതിനെ ചൊല്ലിയുള്ള തര്ക്കങ്ങളില് ഇടപെടില്ലെന്ന് സുപ്രീം കോടതി
ന്യൂഡല്ഹി: ഓര്ത്തഡോക്സ്- യാക്കോബായ സഭകള് തമ്മില് മൃതദേഹം സംസ്കരിക്കുന്നതിനെ ചൊല്ലിയുള്ള തര്ക്കങ്ങളില് ഇടപെടില്ലെന്ന് സുപ്രീം കോടതി. സംസ്കാര ചടങ്ങുകള് നിര്വഹിക്കുന്ന വൈദികന് ആരെന്നത് കോടതിയുടെ വിഷയമല്ല. മൃതദേഹങ്ങളോട് ആദരവ് കാണിക്കണമെന്നും ജസ്റ്റീസ് അരുണ് മിശ്ര ഹര്ജിക്കാരോട് പറഞ്ഞു. ഓര്ത്തഡോക്സ് സഭ നല്കിയ കോടതി അലക്ഷ്യ ഹര്ജി പരിഗണിക്കുന്നതിനിടെയായിരുന്നു കോടതിയുടെ പരാമര്ശങ്ങള്.
വാദത്തിനിടെ ശവസംസ്കാരവുമായി ബന്ധപ്പെട്ട് സര്ക്കാര് കൊണ്ടുവന്ന ഓര്ഡിനന്സും ഓര്ത്തഡോക്സ് സഭ അഭിഭാഷകര് കോടതിയുടെ ശ്രദ്ധയില്പ്പെടുത്തി. എന്നാല് 2017ലെ വിധി പള്ളികളുടെ ഭരണവുമായി ബന്ധപ്പെട്ട് മാത്രമാണെന്നും അതിനപ്പുറത്തുള്ള വിഷയങ്ങളില് ഇടപെടില്ലെന്നും കോടതി വ്യക്തമാക്കി. കൂടുതല് നിര്ബന്ധം പിടിച്ചാല് ഓര്ത്തഡോക്സ് സഭയുടെ കോടതി അലക്ഷ്യ ഹര്ജി തള്ളുമെന്നും ജസ്റ്റീസ് അരുണ് മിശ്ര മുന്നറിയിപ്പ് നല്കി.