കേരള പൊലീസില് വീണ്ടും അഴിച്ചു പണി; സഞ്ജയ്കുമാര് ഗരുഡിന് തിരുവനന്തപുരം സിറ്റിപോലീസ് കമ്മിഷണര്
തിരുവനന്തപുരം: ലോക്സഭാ തെരഞ്ഞെടുപ്പിന് മുന്നോടിയായി കേരള പൊലീസില് വീണ്ടും അഴിച്ചു പണി. എഡിജിപിമാര് മുതല് കമ്മീഷണര്മാര് വരെയുള്ള അഴിച്ചു പണിയുടെ ഭാഗമായി സ്ഥലം മാറ്റിയിട്ടുണ്ട്. നേരത്തെ കേരള പൊലീസില് നടപ്പാക്കാന് തീരുമാനിച്ച ഘടനാമാറ്റം തല്കാലം മരവിപ്പിച്ചു. പുതിയ ഘടന തെരഞ്ഞെടുപ്പിന് ശേഷം നിലവില് വരും. അതുവരെ നിലവിലെ ഘടന തുടരും.
ഇതിന്റെ ഭാഗമായി ഉത്തരമേഖല ദക്ഷിണമേഖല എഡിജിപിമാരെ മാറ്റി നിയമിച്ചു. മനോജ് എബ്രഹാം ദക്ഷിണാമേഖല എഡിജിപിയായി തുടരും. ഷെയ്ഖ് ദര്വേസ് സാഹിബ് ഉത്തരമേഖല എഡിജിപിയാവും. നിലവില് ക്രൈംബ്രാഞ്ച് എഡിജിപിമാരാണ് ഇരുവരും.
അശോക് യാദവ് ഐപിഎസിനെ തിരുവനന്തപുരം റേയ്ഞ്ച് ഐജിയായും, എം.ആര്.അജിത്ത് കുമാറിനെ കണ്ണൂര് റെയ്ഞ്ച് ഐജിയായും, ബല്റാം കുമാര് ഉപാധ്യായയെ തൃശ്ശൂര് റേയ്ഞ്ച് ഐജിയായും നിയമിച്ചു. തിരുവന്തപുരം കമ്മീഷണര് സ്ഥാനത്ത് നിന്നും പൊലീസ് ആസ്ഥാനത്തേക്ക് മാറ്റിയ ഡിഐജി എസ്.സുരേന്ദ്രനെ കൊച്ചി സിറ്റി പൊലീസ് കമ്മീഷണറായി നിയമിച്ചു.
കോഴിക്കോട് സിറ്റി പൊലീസ് കമ്മീഷണര് സഞ്ജയ് കുമാര് ഗരുഡിനെ തിരുവനന്തപുരം സിറ്റി പൊലീസ് കമ്മീഷണറായി നിയമിച്ചു. തിരുവനന്തപുരം നഗരത്തില് രണ്ട് മാസത്തിനിടെ വരുന്ന മൂന്നാമത്തെ കമ്മീഷണറാണ് സഞ്ജയ് കുമാര് ഗരുഡിന്. സഞ്ജയ് കുമാര് ഗരുഡിന് പകരം എവി ജോര്ജിനെയാണ് പുതിയ കോഴിക്കോട് സിറ്റി പൊലീസ് കമ്മീഷണറായി നിയമിച്ചിരിക്കുന്നത്.