ഇന്ത്യന്‍ ഒളിമ്പിക് അസോസിയേഷന്‍ അഡ്‌ഹോക്ക് കമ്മിറ്റി രൂപീകരിച്ചു
ന്യൂഡല്‍ഹി : ദേശീയ ഗുസ്തി ഫെഡറേഷന്‍ (ഡബ്ല്യുഎഫ്‌ഐ) സസ്പെന്ഡ് ചെയ്ത സാഹചര്യത്തില്‍ ഫെഡറേഷന്റെ കാര്യങ്ങള്‍ നിയന്ത്രിക്കാന്‍ ഇന്ത്യന്‍ ഒളിമ്പിക് അസോസിയേഷന്‍ താത്കാലിക സമിതി രൂപീകരിച്ചു. ഭൂപീന്ദര്‍ സിംഗ് ബജ് വ അധ്യക്ഷനായ അഡ്‌ഹോക്ക് കമ്മിറ്റിയില്‍ എംഎം സോമയ്യ, മഞ്ജുഷ കന്‍വാര്‍ എന്നിവര്‍ അംഗങ്ങളാണ്.
നീതിയും ഉത്തരവാദിത്തവും സുതാര്യതയും ഉറപ്പാക്കുന്നതിനാണ് പുതിയ അഡ് ഹോക്ക് കമ്മിറ്റിയെ നിയമിക്കുന്നതെന്ന് ഐ ഒ എ അറിയിച്ചു.
ഒളിംപിക് മെഡല്‍ ജേതാവ് സാക്ഷി മാലിക്ക് ഉള്‍പ്പെടെയുള്ള ഗുസ്തി താരങ്ങളുടെ പ്രതിഷേധത്തെ തുടര്‍ന്ന്, ലൈംഗികാരോപണ വിധേയനായ മുന്‍ ഗുസ്തി ഫെഡറേഷന്‍ മേധാവി ബ്രിജ് ഭൂഷണ്‍ ശരണ്‍ സിങ്ങിന്റെ വിശ്വസ്തനായ സഞ്ജയ് സിങ്ങിന്റെ നേതൃത്വത്തിലുള്ള പാനലിനെ ഞായറാഴ്ച കായിക മന്ത്രാലയം സസ്പെന്ഡ് ചെയ്തിരുന്നു.