മണിപ്പൂര് സംഘര്ഷത്തില് ഇതുവരെ 54 പേര് മരിച്ചു
ഇംഫാല് : മണിപ്പൂര് സംഘര്ഷത്തില് 54 മരണമെന്ന് റിപ്പോര്ട്ട്. ഇംഫാല് ഈസ്റ്റില് മാത്രം 23 പേരാണ് മരിച്ചത്. മരിച്ചവരുടെ മൃതദേഹങ്ങള് ചുരാചന്ദ് ജില്ലാ ആശുപത്രി, ഇംഫാല് റീജണല് ഇന്സ്റ്റിറ്റിയൂട്ട്, ജവഹര്ലാല് നെഹ്റു മെഡിക്കല് സയന്സ് ആശുപത്രികളില് സൂക്ഷിച്ചിരിക്കുകയാണ്. സംഘര്ഷ മേഖലകളില് സൈന്യത്തിന്റെ കാവല് തുടരുകയാണ്.
ഭൂരിപക്ഷം വരുന്ന മെയ്തേയി സമുദായത്തിന് പട്ടികവര്ഗ പദവി നല്കിയതിനെതിരെ മണിപ്പൂരില് സംഘര്ഷം കനക്കുകയാണ്. സംഘര്ഷം രൂക്ഷമായ പ്രദേശങ്ങളില് സൈന്യത്തെയും അസം റൈഫിള്സിനെയും വിന്യസിച്ചതായി മണിപ്പൂര് മുഖ്യമന്ത്രി എന് ബിരേന് സിംഗ് വ്യക്തമാക്കി. കേന്ദ്ര ആഭ്യന്തരമന്ത്രി അമിത് ഷാ മുഖ്യമന്ത്രിയുമായി സംസാരിച്ചു.
നിലവിലുള്ള നിയമമനുസരിച്ച്, സംസ്ഥാനത്തെ മലയോര മേഖലകളില് മെയ്തികള്ക്ക് താമസിക്കാന് അനുവാദമില്ല. ആദിവാസി ഇതര വിഭാഗമായ മെയ്തേയി വിഭാഗത്തിന് പട്ടിക വര്ഗ പദവി നല്കുന്നതിനിതിരെയാണ് സംസ്ഥാനത്തെ ആദിവാസി വിഭാഗം പ്രക്ഷോഭം നടത്തുന്നത്