മധുവിന്റെ കുടുംബത്തെ ഭീഷണിപ്പെടുത്തിയ കേസ്; പ്രതിക്ക് ഉപാധികളോടെ ജാമ്യം
പാലക്കാട് : അട്ടപ്പാടിയില് ആള്ക്കൂട്ട മര്ദനത്തില് കൊല്ലട്ടെ മധുവിന്റെ കുടുംബത്തെ ഭീഷണിപ്പെടുത്തിയ കേസില് അറസ്റ്റിലായ ഷിഫാന് ജാമ്യം. മണ്ണാര്ക്കാട് എസ്സിഎസ്ടി കോടതിയാണ് ജാമ്യം അനുവദിച്ചത്. അട്ടപ്പാടി താലൂക്കില് പ്രവേശിക്കരുത് എന്ന ഉപാധിയോടെയാണ് ജാമ്യം അനുവദിച്ചത്. മധുവിന്റെ അമ്മ മല്ലിയെ ഭീഷണിപ്പെടുത്തിയെന്നാണ് കേസ്. കേസില് മുക്കാലി പറയന്കുന്ന് സ്വദേശി ഷിഫാന്റെ ജാമ്യാപേക്ഷ നേരത്തെ കോടതി തള്ളിയിരുന്നു.
പത്ത് ദിവസം കഴിഞ്ഞ് വീണ്ടും കോടതിയെ സമീപിക്കാമെന്നും അതിന് മുന്പ് ജാമ്യത്തിന് വേണ്ടി ഹൈക്കോടതിയെ സമീപിക്കാമെന്നും കോടതി വ്യക്തമാക്കിയിരുന്നു.കേസില് നിന്ന് പിന്മാറാന് മധുവിന്റെ കുടുംബത്തെ ഭീഷണിപ്പെടുത്തിയെന്ന കേസിലെ ഒന്നാം പ്രതി അബ്ബാസിന്റെ മകളുടെ മകനാണ് ഷിഫാന്. കഴിഞ്ഞ ദിവസം ഷിഫാന്റെ താമസസ്ഥലത്ത് നടത്തിയ റെയ്ഡില് കണക്കില്പ്പെടാത്ത 36 ലക്ഷം രൂപ പൊലീസ് കണ്ടെത്തിയിരുന്നു. അതേ സമയം വധകേസില് സാക്ഷികളെ സ്വാധീനിക്കാന് ശ്രമിച്ചതിന് 12 പ്രതികളുടെ ജാമ്യം കോടതി റദ്ദാക്കിയിരുന്നു.