23,652 പേര്ക്ക് കോവിഡ് നഷ്ടപരിഹാരം നല്കിയെന്ന് കേരളം സുപ്രീംകോടതിയില്
ന്യൂഡല്ഹി : കോവിഡ് നഷ്ടപരിഹാരത്തിന് അപേക്ഷിച്ചവരില് 23,652 പേര്ക്ക് നഷ്ടപരിഹാരം നല്കിയെന്ന് സംസ്ഥാന സര്ക്കാര്. സുപ്രിംകോടതിയിലാണ് സര്ക്കാര് ഇക്കാര്യം അറിയിച്ചത്.
ആകെ 27,274 അപേക്ഷകളാണ് ലഭിച്ചതെന്നും 80 ശതമാനം പേര്ക്ക് നഷ്ടപരിഹാരം നല്കിയെന്നും കേരളം സുപ്രിംകോടതിയെ അറിയിച്ചു.
ഇതിനിടെ രാജ്യത്തെ കൊവിഡ് മരണക്കണക്ക് സംസ്ഥാനങ്ങള് പുറത്ത് വിട്ടതിനേക്കാള് ഒമ്പത് മടങ്ങ് വരെ കൂടുതലായിരിക്കാമെന്ന് റിപ്പോര്ട്ട്. സര്ക്കാറുകള് സുപ്രിം കോടതിയില് നല്കിയ കണക്കുകളാണ് ഈ സൂചന നല്കുന്നത്. സുപ്രിം കോടതി ഉത്തരവനുസരിച്ചുള്ള കോവിഡ് മരണങ്ങള്ക്കുള്ള നഷ്ടപരിഹാരത്തിനായി വന്ന അപേക്ഷകളുടെ കണക്കിലാണ് ഇത് സൂചിപ്പിക്കുന്നത്.
കോവിഡ് ബാധിച്ച് മരിച്ചവരുടെ ബന്ധുക്കള്ക്ക് 50,000 രൂപവീതം നഷ്ടപരിഹാരം നല്കാമെന്ന് കേന്ദ്ര സര്ക്കാര് സുപ്രിംകോടതിയില് വ്യക്തമാക്കിയിരുന്നു. കേന്ദ്രസര്ക്കാര് നിര്ദേശം സുപ്രിംകോടതി അംഗീകരിക്കുകയും ചെയ്തിരുന്നു. ദുരന്തനിവാരണ ഫണ്ടില് നിന്ന് സംസ്ഥാനങ്ങള് വേണം ഇത് നല്കേണ്ടതെന്നും കേന്ദ്രം സത്യവാങ്മൂലത്തില് പറയുന്നു. നഷ്ടപരിഹാര വിതരണത്തിന് സുപ്രിംകോടതി നിര്ദേശപ്രകാരം ദേശീയ ദുരന്തനിവാരണ അതോറിറ്റി തയാറാക്കിയ മാര്ഗരേഖയും സമര്പ്പിച്ചിട്ടുണ്ട്.