മുട്ടില് മരംമുറിക്കേസിലെ ധര്മടം ബന്ധം മുഖ്യമന്ത്രി വ്യക്തമാക്കണം: പ്രതിപക്ഷ നേതാവ്
തിരുവനന്തപുരം: മുട്ടില് മരംമുറിക്കേസില് സ്വന്തം വകുപ്പിലെ മരം സംരക്ഷിക്കാന് നിലപാട് എടുത്ത ഉദ്യോഗസ്ഥരെ വിരട്ടുകയും ഭീഷണിപ്പെടുത്തുകയും കള്ളക്കേസില് കുടുക്കാന് ശ്രമിക്കുകയും ചെയ്ത ഉദ്യോഗസ്ഥനെ സംരക്ഷിക്കുന്നതിലെ ധര്മ്മടം ബന്ധമെന്താണെന്ന് മുഖ്യമന്ത്രി പിണറായി വിജയന് വ്യക്തമാക്കണമെന്ന് പ്രതിപക്ഷ നേതാവ് വി.ഡി. സതീശന്.
ഈ കേസിലെ ധര്മടം ബന്ധം മുഖ്യമന്ത്രി വ്യക്തമാക്കണം. സംഭവത്തില് മുഖ്യമന്ത്രിക്ക് നേരിട്ട് ബന്ധമുണ്ടെന്ന് വ്യക്തമാക്കുന്ന റിപ്പോര്ട്ടാണ് പുറത്തുവന്നിരിക്കുന്നതെന്നും സതീശന് ആരോപിച്ചു. ഗുരുജയന്തി സമ്മേളനത്തില് പങ്കെടുത്ത ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
സത്യസന്ധമായ നിലപാട് എടുത്ത വനംവകുപ്പിലെ ഉദ്യോഗസ്ഥരെ നിയമസഭയില് ഞങ്ങള് സല്യൂട്ട് ചെയ്തു. കാരണം സര്ക്കാരിന്റെ ഉത്തരവ് തന്നെ മരംമുറിക്ക് അനുകൂലമായിട്ടാണ്. എന്നിട്ടും മരം സംരക്ഷിക്കുന്നതിന് വേണ്ടി ധീരമായ, സത്യസന്ധമായ നിലപാടെടുത്ത ഉദ്യോഗസ്ഥര് ഉളളതുകൊണ്ടാണ് കള്ളക്കച്ചവടം പിടിക്കാന് കഴിഞ്ഞതെന്നും സതീശന് പറഞ്ഞു.