രാജ്യപാരമ്പര്യ മഹത്വം അയോദ്ധ്യയില്‍ പ്രതിഫലിക്കണമെന്ന് പ്രധാനമന്ത്രി
ന്യൂഡല്‍ഹി:രാജ്യ പാരമ്ബര്യത്തിന്റെ മഹത്വവും വികസന പ്രവര്‍ത്തനങ്ങളുടെ മികവും അയോദ്ധ്യയില്‍ പ്രതിഫലിക്കണമെന്ന് പ്രധാനമന്ത്രി നരേന്ദ്രമോദി. അയോധ്യ വികസനവുമായി ബന്ധപ്പെട്ട് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥുമായി ഓണ്‍ലൈന്‍ വഴി കൂടിക്കാഴ്ച നടത്തവേയാണ് ഇക്കാര്യം അറിയിച്ചത്.
ഉന്നതിയുടെയും ആത്മീയതുടെയും കേന്ദ്രമായിരിക്കണം അയോധ്യ. ജീവിതത്തില്‍ ഒരിക്കലെങ്കിലും അയോധ്യ സന്ദര്‍ശിക്കണമെന്ന് അടുത്ത തലമുറക്ക് തോന്നണം. തീര്‍ത്ഥാടകര്‍ക്കും വിനോദ സഞ്ചാരികള്‍ക്കും ഓരോ പൗരനും അയോധ്യ വികസനം ഗുണം ചെയ്യണമെന്നും യോഗത്തില്‍ പ്രധാനമന്ത്രി അറിയിച്ചു.
ആളുകളെ ഒന്നിപ്പിക്കാനുള്ള കഴിവ് ശ്രീരാമന് ഉണ്ടെന്നും, അയോദ്ധ്യയുടെ വികസന പ്രവര്‍ത്തനങ്ങള്‍ ആരോഗ്യകരമായ പൊതുജന പങ്കാളിത്തത്തോടെ, പ്രത്യേകിച്ച്‌ യുവാക്കള്‍ നയിക്കണമെന്നും പ്രധാനമന്ത്രി പറഞ്ഞു. നഗരത്തിലെ ഈ വികസനത്തില്‍ നമ്മുടെ ചെറുപ്പക്കാരുടെ കഴിവുകള്‍ പ്രയോജനപ്പെടുത്തണമെന്നും അദ്ദേഹം ആവശ്യപ്പെട്ടു.
യോഗത്തില്‍ നഗര വികസനത്തിന്റെ ബ്ലൂപ്രിന്റ് മുഖ്യമന്ത്രി യോഗി ആദിത്യനാഥ് അവതരിപ്പിച്ചു. 1200 ഏക്കറോളം വരുന്ന അയോധ്യ നഗരത്തിലെ വികസന പ്രവര്‍ത്തനങ്ങളും യോഗത്തില്‍ വിലയിരുത്തി. വിമാനത്താവളമടക്കമുള്ള വന്‍ വികസന പദ്ധതികളാണ് അയോധ്യയില്‍ നടപ്പാക്കുന്നത്. രാമക്ഷേത്രത്തിന് തറക്കല്ലിട്ടതിന് ശേഷം വന്‍ വികസന പദ്ധതികളാണ് അയോധ്യയില്‍ സര്‍ക്കാര്‍ പ്രഖ്യാപിച്ചത്. അയോധ്യയെ തീര്‍ത്ഥാടന- വിനോദ സഞ്ചാര കേന്ദ്രമാക്കാനാണ് സര്‍ക്കാരിന്റെ തീരുമാനം.
അയോധ്യവികസനവുമായി ബന്ധപ്പെട്ട് രണ്ടാം തവണയാണ് യോഗം നടക്കുന്നത്. യോഗി ആദിത്യനാഥിന് പുറമെ, രണ്ട് ഉപമുഖ്യമന്ത്രിമാരും യോഗത്തില്‍ പങ്കെടുത്തു.