ആദായ നികുതി റിട്ടേണ് മേയ് 31ലേക്ക് നീട്ടി
ന്യൂഡല്ഹി: ആദായനികുതിയുമായി ബന്ധപ്പെട്ട വിവിധ നടപടികളില് 2021 മേയ് 31 വരെ ഇളവുകള് പ്രഖ്യാപിച്ച് കേന്ദ്ര പ്രത്യക്ഷ നികുതി ബോര്ഡ് (സി.ബി.ഡി.ടി). 2019-20 സാമ്ബത്തിക വര്ഷത്തെ അവസാന തീയതി കഴിഞ്ഞതും പുതുക്കി സമര്പ്പിക്കുന്നതുമായ ആദായ നികുതി റിട്ടേണുകളുടെ തീയതിയാണ് മേയ് 31 ലേക്ക് നീട്ടിയത്. തീയതി നീട്ടണമെന്ന് വിവിധ കോണുകളില് നിന്ന് ആവശ്യമുയര്ന്നതിനെ തുടര്ന്നാണ് കേന്ദ്ര നടപടി.
ഈ വര്ഷം മാര്ച്ച് 31നകം നല്കേണ്ടിയിരുന്ന 2020-21 സാമ്ബത്തിക വര്ഷത്തെ റിട്ടേണുകളും മേയ് 31നകം നല്കിയാല് മതി. ആദായ നികുതി നിയമത്തിലെ 139ാം വകുപ്പിന് കീഴില് വരുന്ന നാല്, അഞ്ച് ഉപ വകുപ്പുകളിലെ വൈകിയ റിട്ടേണുകളും പുതുക്കി നല്കുന്നതുമായ റിട്ടേണുകള്ക്കാണ് ഇൗ ഇളവ്.
നികുതി സംബന്ധിച്ച തര്ക്കങ്ങള്, കമീഷണര്ക്ക് അപ്പീല് എന്നിവ നല്കാനുള്ള തീയതിയും മേയ് 31ലേക്ക് നീട്ടിയിട്ടുണ്ട്.