ആസാമില്‍ പൗരത്വ ഭേദഗതി നിയമം നടപ്പാകില്ലെന്ന് ഉറപ്പാക്കും : രാഹുല്‍ ഗാന്ധി
ഗുവാഹതി: ആസാമില്‍ കോണ്‍ഗ്രസ് അധികാരത്തിലെത്തിയാല്‍ പൗരത്വ ഭേദഗതി നിയമം നടപ്പാകില്ലെന്ന് ഉറപ്പാക്കുമെന്ന് കോണ്‍ഗ്രസ് നേതാവ് രാഹുല്‍ ഗാന്ധി.നാഗ്പൂരില്‍നിന്നുള്ള ഏക ശക്തി രാജ്യം മുഴുവന്‍ നിയന്ത്രിക്കാന്‍ ശ്രമിക്കുകയാണെന്നും അത് സ്നേഹം കൊണ്ട് ചെറുക്കല്‍ യുവാക്കളൂടെ ബാധ്യതയാണെന്നും അദ്ദേഹം പറഞ്ഞു .ആസാമിലെ ദിബ്രുഗഡില്‍ കോളജ് വിദ്യാര്‍ഥികളുമായി നടന്ന സംവാദത്തിലാണ് രാഹുല്‍ ഗാന്ധിയുടെ പ്രസ്താവന .
‘ഒരു മതവും വൈരം പഠിപ്പിക്കുന്നില്ല. ബി.ജെ.പി മനുഷ്യര്‍ക്കിടയില്‍ ഭിന്നത തീര്‍ക്കാന്‍ വെറുപ്പ് വില്‍പന നടത്തുകയാണ്. അവര്‍ എവിടെചെന്ന് വെറുപ്പ് പ്രചരിപ്പിക്കാന്‍ ശ്രമിച്ചാലും കോണ്‍ഗ്രസ് അവിടെ സ്നേഹവും സൗഹാര്‍ദവും ഉറപ്പാക്കും”- രാഹുല്‍ കൂട്ടിച്ചേര്‍ത്തു.
രണ്ടു ദിവസത്തെ സന്ദര്‍ശനത്തിനായി ആസാമിലെത്തിയ രാഹുല്‍ പാര്‍ട്ടിയുടെ തെരഞ്ഞെടുപ്പ് പ്രകടന പത്രിക ശനിയാഴ്ച പുറത്തുവിടുമെന്നാണ് പ്രതീക്ഷിക്കുന്നത്.