ഡിഎംകെയുമായുള്ള സീറ്റ് വിഭജന ചര്‍ച്ചകള്‍ക്ക് ഉമ്മന്‍ ചാണ്ടിയെ നിയോഗിച്ചു
ന്യൂഡല്‍ഹി: തമിഴ്നാട് നിയമസഭാ തെരഞ്ഞെടുപ്പില്‍ ഡിഎംകെയുമായുള്ള സീറ്റ് വിഭജന ചര്‍ച്ചകള്‍ക്ക് ഉമ്മന്‍ ചാണ്ടിയെ നിയോഗിച്ചു. ഉമ്മന്‍ ചാണ്ടിക്കൊപ്പം കോണ്‍ഗ്രസിന്‍റെ മാധ്യമവിഭാഗം മേധാവി രണ്‍ദീപ് സിംഗ് സുര്‍ജെവാലയെയും നിയോഗിച്ചിട്ടുണ്ട്. ചര്‍ച്ചകള്‍ക്കായി ഉമ്മന്‍ ചാണ്ടി ചെന്നൈയിലെത്തി. നാളെ രാവിലെ ഡി.എം.കെ ആസ്ഥാനത്താണ് ആദ്യഘട്ട ചര്‍ച്ച.
കഴിഞ്ഞ തവണ മല്‍സരിച്ച 41 സീറ്റുകള്‍ ഇത്തവണയും വേണമന്നാണ് കോണ്‍ഗ്രസ് നിലപാട്. എന്നാല്‍ പകുതി സീറ്റുകള്‍ മാത്രമേ നല്‍കാന്‍ കഴിയൂവെന്നാണ് ഡി.എം.കെ കേന്ദ്രങ്ങള്‍ പറയുന്നത്. ഇതോടൊപ്പം പുതുച്ചേരിയില്‍ ഡി.എം.കെയുമായി നിലനില്‍ക്കുന്ന പ്രശ്നങ്ങളിലും ആശയവിനിമയം നടക്കും. പുതുച്ചേരിയില്‍ സഖ്യം വിട്ടു തനിച്ചു മല്‍സരിക്കാന്‍ ഒരുങ്ങുകയാണു ഡി.എം.കെ.
അതേസമയം, ഉമ്മന്‍ ചാണ്ടിക്ക് പുതിയ ചുമതല നല്‍കിയത് മാറ്റി നിര്‍ത്തലല്ലെന്നും എഐസിസി അറിയിച്ചു. ഉമ്മന്‍ചാണ്ടി തെരഞ്ഞെടുപ്പില്‍ മത്സരിക്കുന്നതിനെ ഇത് ബാധിക്കില്ലെന്നും വ്യക്തമാക്കി.