സൗജന്യ റേഷന് പദ്ധതി അട്ടിമറിച്ചശേഷം “ഇലക്ഷന് സൗജന്യം’: ഉമ്മന് ചാണ്ടി
തിരുവനന്തപുരം: യുഡിഎഫ് സര്ക്കാര് അഞ്ചു വര്ഷം നടപ്പാക്കിയ സൗജന്യ റേഷന് പദ്ധതി അട്ടിമറിച്ച ശേഷമാണ് ഇപ്പോള് ഇടതുസര്ക്കാര് എപിഎല് വിഭാഗത്തിന് കുറഞ്ഞ നിരക്കില് ഒരു തവണ അരി നല്കാമെന്നു ബജറ്റില് പ്രഖ്യാപിച്ചതെന്ന് മുന് മുഖ്യമന്ത്രി ഉമ്മന് ചാണ്ടി.
വരവുചെലവ് കണക്കുപോലും നോക്കാതെ വാഗ്ദാനങ്ങള് പ്രവഹിച്ച ഈ ബജറ്റിന് വിശ്വാസ്യതയില്ലെന്നും മുന് മുഖ്യമന്ത്രി വിമര്ശിച്ചു.
അഞ്ചു വര്ഷം ബിപിഎല് കുടുംബങ്ങള്ക്ക് സൗജന്യ അരിയും എപിഎല് കുടുംബങ്ങള്ക്ക് കേന്ദ്ര സര്ക്കാര് സംസ്ഥാനത്തിനു തരുന്ന അതേ വിലയായ 8.90 രൂപയ്ക്ക് അരിയുമാണ് യുഡിഎഫ് സര്ക്കാര് നല്കിയത്. ഇടതുസര്ക്കാര് ബിപിഎല് കാര്ഡുകള്ക്ക് രണ്ടു രൂപയ്ക്കും എപിഎല് കാര്ഡുകള്ക്ക് രണ്ടു രൂപ കൂടി വര്ധിപ്പിച്ച് 10.90 രൂപയ്ക്കുമാണ് റേഷനരി നല്കുന്നത്. തെരഞ്ഞെടുപ്പ് അടുത്തപ്പോള് മാത്രമാണ് എപിഎല്ലിന് കുറഞ്ഞ നിരക്കില് അരി പ്രഖ്യാപിച്ചത്. യുഡിഎഫ് ഗവണ്മെന്റ് 2013ല് ഭരണാനുമതി കൊടുത്ത പേട്ട – തൃപ്പൂണിത്തുറ മെട്രോ ലൈന് ഈ വര്ഷം പൂര്ത്തിയാക്കുമെന്നു പ്രഖ്യാപിച്ചത് അഞ്ചു വര്ഷം പാഴാക്കിയ ശേഷമാണ്. 1000 ദിവസം കൊണ്ട് പൂര്ത്തിയാക്കാന് ലക്ഷ്യമിട്ട് പണി ആരംഭിച്ച വിഴിഞ്ഞം തുറമുഖം ഒരിടത്തും എത്തിയിട്ടില്ല. കഴിഞ്ഞ അഞ്ചു വര്ഷം തറവില വര്ധിപ്പിക്കാതെയിരുന്ന ഗവണ്മെന്റ് 20 രൂപ മാത്രം കൂട്ടിയത് റബര് കര്ഷകരെ തീര്ത്തും നിരാശരാക്കി. റബറിന്റെ താങ്ങുവില കുറഞ്ഞത് 200 രൂപയാക്കണം. കുടിശിഖ ഉടനെ നല്കണം. കഴിഞ്ഞ വര്ഷം പ്രഖ്യാപിച്ച റബര്പാര്ക്കും റൈസ് പാര്ക്കും ആവര്ത്തിച്ചിരിക്കുകയാണെന്നും ഉമ്മന് ചാണ്ടി പറഞ്ഞു