ആത്മഹത്യയ്ക്കു ശ്രമിച്ച് ചികിത്സയിലായിരുന്ന വീട്ടമ്മയും മരിച്ചു
തിരുവനന്തപുരം: കോടതിയുത്തരവുപ്രകാരം കൈയേറ്റം ഒഴിപ്പിക്കാനെത്തിയവര്ക്കുമുന്നില് തീകൊളുത്തി ആത്മഹത്യയ്ക്കു ശ്രമിച്ച ദമ്ബതിമാരിലെ ഭാര്യയും മരിച്ചു. ഭര്ത്താവ് രാജന് രാവിലെ മരിച്ചു. ഗുരുതര പരുക്കുകളോടെ ആശുപത്രിയിലായിരുന്ന ഭാര്യ അമ്ബിളിയുടെ മരണം ഇന്ന് വെെകീട്ടാണ് സ്ഥിരീകരിച്ചത്.
നെയ്യാറ്റിന്കര നെല്ലിമൂട് പോങ്ങില് നെട്ടതോട്ടം കോളനിക്കുസമീപം രാജന് (47) ഇന്നുരാവിലെയാണ് മരിച്ചത്. കുടിയൊഴിപ്പിക്കല് തടയാനാണ് രാജന് ഭാര്യയെ ചേര്ത്തുപിടിച്ച് പെട്രോള് ഒഴിച്ച് ആത്മഹത്യ ഭീഷണി മുഴക്കിയത്. രാജന് 75 ശതമാനം പൊള്ളലേറ്റിരുന്നു. ഇദ്ദേഹത്തിന്റെ രണ്ട് വൃക്കകളും തകരാറിലായിരുന്നു എന്നാണ് വിവരം.
നെയ്യാറ്റിന്കരയില് തര്ക്കഭൂമിയിലെ ഒഴിപ്പിക്കല് നടപടിക്കിടെയാണ് രാജനും ഭാര്യ അമ്ബിളിയും തീകൊളുത്തിയത്. മെഡിക്കല് കോളേജ് ആശുപത്രിയില് ചികിത്സയിലിരിക്കെയാണ് അന്ത്യം. ആത്മഹത്യാഭീഷണി മാത്രമായിരുന്നു ലക്ഷ്യമെന്നും പൊലീസിടപെട്ടതോടെയാണ് തീകൊളുത്തേണ്ടിവന്നതെന്നും രാജന് മൊഴി നല്കിയിരുന്നു.
രാജന് അയല്വാസിയായ വസന്തയുടെ വസ്തു കയ്യേറി കുടില്കെട്ടിയെന്ന് നേരത്തെ പരാതി ഉയര്ന്നിരുന്നു. ഇതില് കോടതി അഭിഭാഷക കമ്മീഷനെ നിയമിക്കുകയായിരുന്നു. കമ്മീഷനുമായി വീട് ഒഴിപ്പിക്കാനെത്തിയപ്പോഴായിരുന്നു സംഭവം. രാജന് ഭാര്യ അമ്ബിളിയെ ചേര്ത്ത് പിടിച്ച് ദേഹത്തേക്ക് പെട്രോള് ഒഴിക്കുകയായിരുന്നു.
എന്നാല് താന് പെട്രോള് ഒഴിച്ച് പൊലീസിനെ പേടിപ്പിക്കാന് മാത്രമാണ് ശ്രമിച്ചതെന്നും പൊലീസ് കൈതട്ടി മാറ്റാന് ശ്രമിക്കുന്നതിനിടെ തീ ആളിപടരുകയായിരുന്നുവെന്നായിരുന്നു രാജന്റെ മൊഴി.