മുന് രഞ്ജി ട്രോഫി ക്രിക്കറ്റ് താരം സി.കെ. ഭാസ്കരന് അന്തരിച്ചു
ടെക്സസ്: കേരളത്തിന്റെ മുന് രഞ്ജി ട്രോഫി ക്രിക്കറ്റ് താരമായ ഡോ. സി.കെ. ഭാസ്കരന് അന്തരിച്ചു. അദ്ദേഹത്തിന് 79 വയസായിരുന്നു. കേരളത്തില് നിന്ന് ആദ്യമായി ഇന്ത്യന് ടെസ്റ്റ് ടീമില് കളിച്ച താരമാണ് സി.കെ. ഭാസ്കരന് എന്ന ചന്ദ്രോത്ത് കല്യാടന് ഭാസ്കരന്.
സിലോണിനെതിരെ 1965ലായിരുന്നു അനൗദ്യോഗികമായ ആ മത്സരം നടന്നത്. അന്ന് സിലോണിന് (ഇന്നത്തെ ശ്രീലങ്ക) ടെസ്റ്റ് പദവി ഉണ്ടായിരുന്നില്ല. തലശേരിക്കാരനാണ് അദ്ദേഹം. 1957 മുതല് 1966 വരെ രഞ്ജി ട്രോഫിയിലെ സ്ഥിരസാന്നിധ്യമായിരുന്നു. 16-ാം വയസിലായിരുന്നു ഈ വലംകൈ മീഡിയം പേസര് കേരളത്തിനായി അരങ്ങേറുകയുണ്ടായത്. 1966 മുതല് 1969വരെ മദ്രാസിനു വേണ്ടിയും കളിച്ചിട്ടുണ്ട്. എംബിബിഎസ് പാസായ ഭാസ്കരന് ക്രിക്കറ്റ് കരിയര് അവസാനിപ്പിച്ച ശേഷം അമേരിക്കയിലായിരുന്നു താമസമാക്കിയത്. ഭാസ്കരന്റെ സഹോദരന് സി.കെ. വിജനും കേരളത്തിന്റെ മുന് താരമായിരുന്നു.