തൊഴിലാളികള്ക്ക് എടുക്കാവുന്ന ചുമടിന്റെ പരമാവധി ഭാരം 55 കിലോയാക്കി
തിരുവനന്തപുരം: ചുമട്ടു തൊഴിലാളികള്ക്ക് എടുക്കാവുന്ന ചുമടിന്റെ പരമാവധി ഭാരം 55 കിലോയാക്കി കുറച്ചു. നേരത്തെ ഇത് 75 കിലോയായിരുന്നു. ഇത് സംബന്ധിച്ച് ഓര്ഡിനന്സിന് മന്ത്രിസഭ അംഗീകാരം നല്കി. സ്ത്രീകള്, കൗമാരക്കാര് എന്നിവര് എടുക്കുന്ന ചുമടിന്റെ പരമാവധി ഭാരം 35 കിലോയായി നിജപ്പെടുത്തും.
ഇതുമായി ബന്ധപ്പെട്ട് 1978ലെ കേരള ചുമട്ടുതൊഴിലാളി നിയമം ഭേദഗതി ചെയ്യുന്നതിനുള്ള ഓര്ഡിനന്സ് പുറപ്പെടുവിക്കുന്നതിന് ഗവര്ണറോടു ശുപാര്ശ ചെയ്യാന് മന്ത്രിസഭ തീരുമാനിച്ചു. 127 -ാം അന്താരാഷ്ട്ര തൊഴില് സമ്മേളനം അംഗീകരിച്ച ശുപാര്ശ കണക്കിലെടുത്താണു തീരുമാനം.
കേരള ചുമട്ടുതൊഴിലാളി ക്ഷേമ ബോര്ഡിലെ വിരമിച്ചവരും തുടര്ന്ന് വിരമിക്കുന്നവരുമായ സ്ഥിരം ജീവനക്കാര്ക്ക് മുന്കാല പ്രാബല്യത്തോടു കൂടി റിട്ടയര്മെന്റ് ആനുകൂല്യങ്ങള് ലഭ്യമാക്കുന്നതിന് 1978 ലെ കേരള ചുമട്ടുതൊഴിലാളി നിയമത്തിലെ 43-ാം വകുപ്പ് ഭേദഗതി ചെയ്യും. ഇതിനായി 2020-ലെ കേരള ചുമട്ടുതൊഴിലാളി (ഭേദഗതി) ഓര്ഡിനന്സ് പുറപ്പെടുവിക്കും