ഇനി എല്.ഡി.എഫില്; രാജ്യസഭാംഗത്വം രാജിവെക്കും: ജോസ് കെ മാണി
കോട്ടയം: കേരള കോണ്ഗ്രസ് ജോസ് കെ മാണി വിഭാഗം ഇടത് മുന്നണിയുമായി ചേര്ന്ന് പ്രവര്ത്തിക്കുമെന്ന് പ്രഖ്യാപിച്ചു. പാര്ട്ടിയുടെ രാഷ്ട്രീയ പ്രഖ്യാപനം ജോസ് കെ മാണി നടത്തി. ജോസ് കെ മാണി രാജ്യസഭാംഗത്വം രാജിവെക്കും. രാഷ്ട്രീയ ധാർമികത ഉയർത്തിപിടിക്കാനാണ് രാജിയെന്ന് ജോസ് കെ മാണി പറഞ്ഞു. കേരള കോണ്ഗ്രസ് പാര്ലമെന്ററി പാര്ട്ടി യോഗത്തിന് ശേഷമായിരുന്നു പ്രഖ്യാപനം.
38 വര്ഷത്തിന് ശേഷമാണ് കേരള കോണ്ഗ്രസിന്റെ മുന്നണി മാറ്റം. ദീര്ഘകാലത്തെ യുഡിഎഫ് ബന്ധമാണ് അവസാനിപ്പിച്ചത്. മതേതര നിലപാട് കാത്തുസൂക്ഷിക്കുന്നത് ഇടത് മുന്നണിയാണെന്ന് ജോസ് കെ മാണി പറഞ്ഞു.
ഒരു പഞ്ചായത്തിന്റെ പേരിലാണ് തങ്ങളെ യുഡിഎഫ് മുന്നണിയില് നിന്ന് പുറത്താക്കിയതെന്നും ആത്മാഭിമാനം അടിയറവെച്ച് മുന്നോട്ട് പോകാനാകില്ലെന്നും ജോസ് കെ മാണി വ്യക്തമാക്കി. എം.എല്.എമാര് ഉള്പ്പെടെ മാണിക്കൊപ്പം നിന്നവരെ കോണ്ഗ്രസ് അപമാനിച്ചു. ഒരു ചര്ച്ചയ്ക്ക് പോലും കോണ്ഗ്രസ് ഇതുവരെ തയ്യാറായില്ല. തിരിച്ചെടുക്കാന് ഒരു ഫോര്മുല പോലും മുന്നോട്ട് വെച്ചില്ല. പാര്ട്ടിയെ ഹൈജാക്ക് ചെയ്യാനും ശ്രമം ഉണ്ടായി.
കോണ്ഗ്രസ് ജോസഫിനൊപ്പമാണ് നിന്നത്. ജോസഫ് നീചമായ വ്യക്തിഹത്യ നടത്തിയെന്നും ജോസ് കെ മാണി ആരോപിച്ചു.