ഉത്തര്പ്രദേശില് മൂന്നു ദിവസത്തെ സമ്ബൂര്ണ ലോക്ക്ഡൗണ്
ലക്നോ: കോവിഡ് രോഗ വ്യാപനം രൂക്ഷമാകുന്ന സാഹചര്യത്തില് ഉത്തര്പ്രദേശില് മൂന്നു ദിവസത്തെ സമ്ബൂര്ണ ലോക്ക്ഡൗണ്. വെള്ളിയാഴ്ച രാവിലെ 10 ന് ആരംഭിക്കുന്ന ലോക്ക്ഡൗണില് അവശ്യ സര്വീസുകള് മാത്രമാണ് അനുവദിക്കുക. തിങ്കളാഴ്ച പുലര്ച്ചെ അഞ്ച് വരെയാണ് ലോക്ക്ഡൗണ്.
കര്ശന നിയന്ത്രണങ്ങളാണ് ലോക്ക്ഡൗണിന്റെ ഭാഗമായി നടപ്പാക്കുന്നത്. സര്ക്കാര്, സ്വകാര്യ ഓഫീസുകളും സ്ഥാപനങ്ങളും അടഞ്ഞ് കിടക്കും. അവശ്യസാധനങ്ങള് വില്ക്കുന്ന കടകള് മാത്രം തുറക്കും. മാളുകളും റസ്റ്റോറന്റുകളും അടയ്ക്കും. ബസുകള് ഉള്പ്പെടെ പൊതുഗതാഗതം ഉണ്ടായിരിക്കില്ല. ട്രെയിനുകളില് സംസ്ഥാനത്തേക്ക് എത്തുന്ന യാത്രക്കാര്ക്ക് വീടുകളിലെത്താന് പ്രത്യേക ബസുകള് തയാറാക്കാനാണ് അധികൃതര് ശ്രമിക്കുന്നത്.
ഗ്രാമീണ മേഖലകളിലെ ഫാക്ടറികള്ക്ക് ലോക്ക്ഡൗണില് ഇളവുകള് നല്കിയിട്ടുണ്ട്. ഗ്രാമീണ മേഖലയിലെ ഫാക്ടറികള് പ്രവര്ത്തിക്കാന് അനുവദിക്കും. ഹൈവേകള്, എക്സ്പ്രസ് ഹൈവേകള് എന്നിവയുടെ ജോലികളും നടക്കും.