ഞായറാഴ്ച വ്യവസായങ്ങള്‍ക്കും ഭക്ഷണശാലകള്‍ക്കും ഇളവുകള്‍ നല്‍കും
തിരുവനന്തപുരം: സംസ്ഥാനത്ത് ഞായറാഴ്ച സമ്ബൂര്‍ണ ലോക്ഡൗണ്‍ നിര്‍ദേശിച്ചത് വിവേകപൂര്‍വം നടപ്പാക്കണമെന്ന് മുഖ്യമന്ത്രി പിണറായി വിജയന്‍. തുടര്‍ച്ചയായി പ്രവര്‍ത്തിക്കേണ്ട വ്യവസായങ്ങള്‍ക്കും ഭക്ഷണശാലകള്‍ക്കും ഇളവുകള്‍ നല്‍കും. ഓട്ടോറിക്ഷക്ക് ഓടാന്‍ അനുവാദമില്ല. എന്നാല്‍ ചെറിയ കാര്യങ്ങള്‍ക്ക് ഓടാന്‍ സൗകര്യമൊരുക്കാന്‍ കേന്ദ്ര സര്‍ക്കാരിനോട് അഭ്യര്‍ഥിക്കുമെന്നും മുഖ്യമന്ത്രി പറഞ്ഞു.
വിവിധ സംസ്ഥാനങ്ങളില്‍നിന്ന് തിരിച്ചെത്തുന്നവര്‍ ഇവിടെ നിരീക്ഷണത്തില്‍ കഴിയണം. നിര്‍ദേശം ലംഘിക്കുന്നവര്‍ക്കെതിെര കര്‍ശന നിയമനടപടി സ്വീകരിക്കും.
അന്യ സംസ്ഥാനങ്ങളില്‍നിന്ന് പാസ് ലഭിച്ചവരില്‍ 19411 പേര്‍ റെഡ്സോണ്‍ ജില്ലകളില്‍നിന്നാണ്. ഇതുവരെ സംസ്ഥാനത്ത് തിരിച്ചെത്തിയവരില്‍ 8900പേര്‍ റെഡ്സോണ്‍ ജില്ലകളില്‍നിന്നുമാണ്. റെഡ്സോണ്‍ ജില്ലകളില്‍നിന്ന് വന്നവര്‍ 14 ദിവസം സര്‍ക്കാര്‍ ഒരുക്കിയ ക്വാറന്‍റീനില്‍ കഴിയണം. 75 വയസിന് മുകളിലുള്ളവരും 10 വയസില്‍ താഴെയുള്ള കുട്ടികളും ഗര്‍ഭിണികളും 14 ദിവസം വീടുകളില്‍ ക്വാറന്‍റീനില്‍ കഴിയണം. റെഡ് സോണില്‍ നിന്ന് വരുന്നവരെ ചെക്പോസ്റ്റില്‍നിന്നുതന്നെ ക്വാറന്‍റീന്‍ കേന്ദ്രത്തിലേക്ക് മാറ്റും. ഒരു ദിവസം കേരളത്തില്‍ എത്താന്‍ കഴിയുന്ന അത്രയും പേര്‍ക്കാണ് പാസ് നല്‍കുന്നത്. പാസ് വിതരണം നിര്‍ത്തിയില്ലെന്നും അവ ക്രമത്തില്‍ വിതരണം ചെയ്യുമെന്നും മുഖ്യമന്ത്രി കൂട്ടിച്ചേര്‍ത്തു.