പി.ആര്‍.ഡി പത്രക്കുറിപ്പ്‌

സംയോജിത കൃഷി: ഹരിതകേരളം മിഷൻ ഫേസ്ബുക്ക് ലൈവ് ഏഴിന്
സംയോജിത കൃഷി വിഷയമാക്കി ഹരിതകേരളം മിഷൻ ഫേസ്ബുക്ക് ലൈവ് സംഘടിപ്പിക്കുന്നു. വ്യാഴാഴ്ച (മേയ് 7) വൈകിട്ട് മൂന്നുമണി മുതൽ നാലുവരെയാണ് പരിപാടി. സംയോജിത കൃഷി രീതികൾ, ഇതിന് അനുവർത്തിക്കേണ്ട മാർഗ്ഗങ്ങൾ, വിത്ത് തയ്യാറാക്കൽ, വളപ്രയോഗം തുടങ്ങി എല്ലാ കാര്യങ്ങൾക്കും വിശദമായ സംശയനിവാരണം ഫേസ്ബുക്ക് ലൈവിലൂടെ നൽകും.
ഹരിതകേരളം മിഷൻ എക്‌സിക്യുട്ടീവ് വൈസ് ചെയർപേഴ്‌സൺ ഡോ.ടി.എൻ.സീമ, കാർഷിക സർവകലാശാലയുടെ കീഴിലുള്ള ഇന്റഗ്രേറ്റഡ് ഫാമിംഗ് സിസ്റ്റംസ് റിസർച്ച് സ്റ്റേഷനിലെ വിവിധ വകുപ്പ് മേധാവികളും വിദഗ്ദ്ധരുമായ ഡോ.ജേക്കബ് ജോൺ, ഡോ.സജീന എ, ഹിരോഷ് കുമാർ കെ.എസ്, ഹരിതകേരളം മിഷനിലെ കൃഷി ഉപമിഷൻ കൺസൾട്ടന്റ് എസ്.യു.സഞ്ജീവ്, ടെക്‌നിക്കൽ ഓഫീസർ ഹരിപ്രിയാദേവി വി.വി. എന്നിവരാണ് പരിപാടിയിൽ പങ്കെടുക്കുന്നത്. www.facebook.com/harithakeralamission പേജ് സന്ദർശിച്ച് ലൈവ് കാണാം.
പി.എൻ.എക്സ്.1690/2020

നിരാമയ ഇൻഷുറൻസ് കാർഡുകൾ ഡൗൺലോഡ് ചെയ്യാം
2020-21 വർഷത്തേയ്ക്കുള്ള നിരാമയ ഇൻഷുറൻസ് കാർഡുകൾ നാഷണൽ ട്രസ്റ്റിന്റെ സൈറ്റിൽ നിന്നും ഡൗൺലോഡ് ചെയ്യാം. www.thenationaltrust.gov.in എന്ന സൈറ്റിന്റെ ഹോം പേജിൽ നിരാമയകാർഡിൽ ക്ലിക്ക് ചെയ്തു കിട്ടുന്ന പേജിൽ നിങ്ങളുടെ പഴയ കാർഡിലെ ആപ്പ് ഐ.ഡി. നമ്പർ രേഖപ്പെടുത്തി സബ്മിറ്റ് ചെയ്താൽ 2020-21 ലേയ്ക്കുള്ള നിരാമയ കാർഡ് ലഭ്യമാകും. ഈ അവസരം പരമാവധി പ്രയോജനപ്പെടുത്തി അർഹതപ്പെട്ട ചികിത്സാ സഹായം ഗുണഭോക്താക്കൾ ഉറപ്പാക്കണമെന്ന് സാമൂഹ്യനീതി ഡയറക്ടർ അറിയിച്ചു.
പി.എൻ.എക്സ്.1692/2020

ചിത്രാഞ്ജലി സ്റ്റുഡിയോയും കെ.എസ്.എഫ്.ഡി.സി തീയറ്ററുകളും അണുവിമുക്തമാക്കി
സംസ്ഥാന ചലച്ചിത്ര വികസന കോർപ്പറേഷന്റെ (കെ.എസ്.എഫ്.ഡി.സി) തിരുവനന്തപുരത്തെ യൂണിറ്റുകളായ കലാഭവൻ തീയറ്റർ, കൈരളി/ നിള/ ശ്രീ, ചിത്രാഞ്ജലി സ്റ്റുഡിയോ എന്നിവിടങ്ങളിൽ കോവിഡ് 19 നെ തുടർന്ന് അണുനശീകരണം നടത്തി. തിരുവനന്തപുരം കോർപ്പറേഷന്റെ ഫ്യൂമിഗേഷൻ യൂണിറ്റാണ് അണുനശീകരിച്ചത്.
സർക്കാർ നിർദ്ദേശ പ്രകാരം സിനിമാ നിർമ്മാണത്തിന്റെ പോസ്റ്റ് പ്രൊഡക്ഷൻ ജോലികൾ നിർവഹിക്കാൻ അനുമതി ലഭിച്ചതിനെ തുടർന്നാണ് ചിത്രഞ്ജലി സ്റ്റുഡിയോ അണുവിമുക്തമാക്കി പ്രവർത്തനസജ്ജമാക്കിയത്.
പി.എൻ.എക്സ്.1693/2020

അടൂർ ഗോപാലകൃഷ്ണനെ കെ.ആർ നാരായണൻ ഇൻസ്റ്റിറ്റ്യൂട്ട് ചെയർമാനായി നിയമിച്ചു
പ്രശസ്ത സംവിധായകൻ അടൂർ ഗോപാലകൃഷ്ണനെ ഉന്നത വിദ്യാഭ്യാസ വകുപ്പിന് കീഴിലുള്ള കെ.ആർ നാരായണൻ നാഷണൽ ഇൻസ്റ്റിറ്റ്യൂട്ട് ഓഫ് വിഷ്വൽ സയൻസ് & ആർട്‌സിന്റെ അധ്യക്ഷനായി നിയമിച്ച് സർക്കാർ ഉത്തരവായി. നിലവിലുള്ള ചെയർമാൻ ആർ. ഹരികുമാറിന്റെ നിയമനക്കാലയളവ് പൂർത്തിയായതിനെ തുടർന്നാണ് പുതിയ നിയമനം.
സിനിമാ ദൃശ്യകലാ രംഗങ്ങളിലെ പരിശീലനത്തിനും പഠന ഗവേഷണങ്ങൾക്കുമായി കേരള സർക്കാർ സ്ഥാപിച്ച ഇൻസ്റ്റിറ്റ്യൂട്ടിന്റെ അധ്യക്ഷനായി അടൂർ ഗോപാലകൃഷ്ണൻ സ്ഥാനമേൽക്കുന്നതിലൂടെ സ്ഥാപനം ആദരിക്കപ്പെട്ടിരിക്കുന്നുവെന്നും, സ്ഥാപനത്തെ ദേശീയ നിലവാരത്തിലേക്ക് ഉയർത്തുകയെന്ന ലക്ഷ്യത്തിലേക്കുള്ള നർണായക ചുവടുവയ്പ്പാണിതെന്നും ഉന്നതവിദ്യാഭ്യാസ വകുപ്പ് മന്ത്രി ഡോ. കെ.ടി ജലീൽ അറിയിച്ചു.
പി.എൻ.എക്സ്.1694/2020