മുഖ്യമന്ത്രി വധക്കേസ് പ്രതി: വി.ടി. ബല്റാം
പാലക്കാട്: കേരള മുഖ്യമന്ത്രിക്കസേരയിലിരിക്കുന്നത് വധക്കേസ് പ്രതിയാണെന്നും കേരളാ പൊലീസിൽ സാധാരണക്കാർക്ക് വിശ്വാസം നഷ്ടപ്പെട്ടെന്നും വി.ടി. ബൽറാം എംഎൽഎ. പാലക്കാട് യൂത്ത് കോൺഗ്രസ് പ്രതിഷേധപ്രകടനത്തിൽ സംസാരിക്കുകയായിരുന്നു അദ്ദേഹം. കൊന്നവരെയും കൊല്ലിച്ചവരെയും നിയമത്തിനു മുന്നിൽ കൊണ്ടുവരണമെങ്കിൽ പെരിയ കേസ് സിബിഐ അന്വേഷിക്കണമെന്നും ബൽറാം ആവശ്യപ്പെട്ടു.
കേരള ചരിത്രത്തിലെ ആദ്യത്തെ രാഷ്ട്രീയ കൊലപാതകമാണ് വാടിക്കല് രാമകൃഷ്ണന് കൊലക്കേസ്. വാടിക്കല് രാമകൃഷ്ണന് എന്ന തയ്യല് തൊഴിലാളിയെ മഴു കൊണ്ട് തലയ്ക്ക് വെട്ടി കൊന്ന കേസിലെ പ്രതിയായിട്ടുള്ള ആൾ കേരളത്തിന്റെ മുഖ്യമന്ത്രി കസേരയിലിരിക്കുമ്പോൾ ഇത്തരം കുറ്റകൃത്യങ്ങള് കേരളത്തില് ഉണ്ടാവും. കേരള പൊലീസില് നമുക്ക് വിശ്വാസം നഷ്ടപ്പെട്ടിരിക്കുകയാണെന്നും ബൽറാം പറഞ്ഞു.കേരളത്തിലെ സാംസ്കാരിക നായകന്മാര് എന്ന് സ്വയം അവകാശപ്പെടുന്നവര് സിപിഎമ്മിന് സ്തുതി പാടുകയാണ്. കപട സാംസ്കാരിക നായകന്മാരെ, ഇപ്പോള് യഥാർഥ നായകരെ സാംസ്കാരിക കേരളം തിരിച്ചറിഞ്ഞു കൊണ്ടിരിക്കുകയാണ്. സ്വന്തം അനുഭവത്തില് നിന്നും പഠിക്കാന് സിപിഎം തയാറാവണമെന്നും ബൽറാം ആവശ്യപ്പെട്ടു.