ഷീല സണ്ണിക്കെതിരായ എഫ് ഐ ആര്‍ ഹൈക്കോടതി റദ്ദാക്കി
കൊച്ചി : വ്യാജ മയക്കുമരുന്ന് കേസില്‍ ചാലക്കുടി ബ്യൂട്ടി പാര്‍ലര്‍ ഉടമ ഷീല സണ്ണിക്കെതിരായ എഫ് ഐ ആര്‍ ഹൈക്കോടതി റദ്ദാക്കി.
കേസ് റദ്ദാക്കണമെന്നാവശ്യപ്പെട്ട് ഷീല സണ്ണി നല്‍കിയ ഹര്‍ജിയിലാണ് കോടതി ഉത്തരവ്. . ജസ്റ്റിസ് കൗസര്‍ എടപ്പഗത്താണ് എഫ്‌ഐആര്‍ റദ്ദാക്കാന്‍ ഉത്തരവിട്ടത്. എല്‍ എസ് ഡി സ്റ്റാംപ് കൈവശം വച്ചെന്ന പേരില്‍ എക്‌സൈസ് അറസ്റ്റ് ചെയ്ത ഷീല 72 ദിവസം ജയിലില്‍ കഴിയേണ്ടിവന്നിരുന്നു.
കേസ് റദ്ദാകുന്നതോടെ എക്‌സൈസ് പിടിച്ചെടുത്ത ബൈക്കും ഫോണും ഷീല സണ്ണിയ്ക്ക് തിരികെ ലഭിക്കും. കഴിഞ്ഞ ഫെബ്രുവരി 27 നാണ് ചാലക്കുടി ഷീ സ്‌റ്റൈല്‍ ബ്യൂട്ടിപാര്‍ലര്‍ ഉടമയായ ഷീല സണ്ണിയെ ഇരിങ്ങാലക്കുട എക്‌സൈസ് സര്‍ക്കിള്‍ ഇന്‍സ്‌പെക്ടറും സംഘവും കടയിലെത്തി അറസ്റ്റുചെയ്തത്. ലാബ് റിപ്പോര്‍ട്ടില്‍ എക്‌സൈസ് പിടിച്ചെടുത്തത് എല്‍ എസ് ഡി സ്റ്റാംപ് അല്ലെന്ന് തെളിഞ്ഞു. ഷീലയുടെ പക്കല്‍ നിന്ന് 12 എല്‍എസ് ഡി സ്റ്റാംപുകള്‍ കണ്ടെത്തിയെന്നായിരുന്നു കേസ്.