138 ചൈനീസ് വാതുവെപ്പ് ആപ്പുകളും 94 ലോണ് ആപ്പുകളും ഇന്ത്യയില് നിരോധിച്ചു
ന്യൂഡല്ഹി : ചൈനീസ് ആപ്പുകള്ക്കെതിരായി ഇന്ത്യ നടപടി തുടരുന്നു. ചൈനയുടെ 138 വാതുവെപ്പ് ആപ്പുകളും 94 ലോണ് ആപ്പുകളും ഇന്ത്യയില് നിരോധിച്ചു. കേന്ദ്ര ആഭ്യന്തര മന്ത്രാലയത്തിന്റെ റിപ്പോര്ട്ടിന്റെ അടിസ്ഥാനത്തില് ഇന്ഫര്മേഷന് ആന്ഡ് ബ്രോഡ്കാസ്റ്റിംഗ് മന്ത്രാലയമാണു നിരോധനം പ്രഖ്യാപിച്ചത്.
ഇന്ത്യയുടെ പരമാധികാരത്തിനും അഖണ്ഡതയ്ക്കും ഭീഷണി ഉയര്ത്തുന്നുവെന്ന് ചൂണ്ടിക്കാട്ടി ഇന്ഫര്മേഷന് ടെക്നോളജി നിയമത്തിലെ സെക്ഷന് 69 എ പ്രകാരമാണ് നടപടി. ആറ് മാസം മുമ്പ് ചൈനയില് നിന്ന് വായ്പ നല്കുന്ന 28 ആപ്പുകളെ കുറിച്ച് കേന്ദ്ര ആഭ്യന്തര മന്ത്രാലയം അന്വേഷണം ആരംഭിച്ചിരുന്നു. ഇത്തരത്തിലുള്ള 94 ആപ്പുകള് ഇസ്റ്റോറില് ഉണ്ടെന്ന് അന്വേഷണത്തില് കണ്ടെത്തി. ഈ ആപ്പുകള്ക്ക് ഇന്ത്യക്കാരുടെ പ്രധാനപ്പെട്ട ഡാറ്റയിലേക്ക് ആക്സസ് ഉണ്ട്. ചാരവൃത്തി ഉപകരണങ്ങളാക്കി മാറ്റാന് സെര്വര് സൈഡ് സുരക്ഷ ദുരുപയോഗം ചെയ്യാനുള്ള സാധ്യതയുണ്ടെന്നും അന്വേഷണ ഉദ്യോഗസ്ഥര് കണ്ടെത്തിയിരുന്നു