സംസ്ഥാനത്ത് ഓണക്കിറ്റ് വിതരണം ചൊവ്വാഴ്ച മുതല്
തിരുവനന്തപുരം : സംസ്ഥാനത്ത് ഓണക്കിറ്റ് വിതരണം ചൊവ്വാഴ്ച മുതല് റേഷന് കടകള് വഴി ആരംഭിക്കും. തുണി സഞ്ചി ഉള്പ്പടെ 14 ഇനങ്ങളാണ് വിതരണം ചെയ്യുന്നത്. വെളിച്ചെണ്ണ പ്രത്യേകമാകും വിതരണം ചെയ്യുക. ആദ്യം എ എ വൈ കാര്ഡുകാര്ക്കാണ് കിറ്റ് നല്കുന്നത്. തുടര്ന്ന് പിങ്ക്, നീല, വെള്ള കാര്ഡുകാര്ക്ക് വിതരണം ചെയ്യും. നിശ്ചയിച്ച തീയതിക്ക് വാങ്ങാന് കഴിയാത്തവര്ക്ക് അവസാന നാലുദിവസം കിറ്റ് വാങ്ങാം.
ഇത്തവണ കിറ്റില് ഉള്പ്പെടുത്താനുള്ള ശര്ക്കരവരട്ടിയും ചിപ്സും നല്കുന്നത് കുടുംബശ്രീയാണ്. ഇതിനായി 12 കോടി രൂപയുടെ ഓര്ഡറാണ് കുടുംബശ്രീക്ക് നല്കിയത്. നേന്ത്രക്കായ ചിപ്സും ശര്ക്കരവരട്ടിയും ഉള്പ്പെടെ ആകെ 42,63,341 പായ്ക്കറ്റുകളാണ് കരാര് പ്രകാരം കുടുംബശ്രീ പ്രവര്ത്തകര് തയ്യാറാക്കുന്നത്. സംസ്ഥാന വ്യാപകമായി വിവിധ യൂണിറ്റുകളായി തിരിച്ചാണ് നിര്മ്മാണവും പാക്കിംഗും നടന്നത്. 445 കോടിരൂപയാണ് കിറ്റിനായി ആകെ കണക്കുകൂട്ടുന്നത്. ഓണത്തിന് മുന്പ് എല്ലാവരിലേക്കും കിറ്റ് വിതരണം എത്തിക്കാനാണ് സര്ക്കാര് ശ്രമം.