കോവിഡ് ബാധിച്ചവര്ക്ക് ഒമിക്രോണ് ബാധിക്കാനുള്ള സാധ്യത കൂടുതല്
ന്യൂഡല്ഹി : കോവിഡ് ബാധിച്ചവര്ക്ക് ഒമിക്രോണ് ബാധിക്കാനുള്ള സാധ്യത മൂന്ന് മുതല് അഞ്ച് മടങ്ങ് വരെ കൂടുതലാണെന്ന് ലോകാരോഗ്യ സംഘടന.
കോവിഡ് ബാധിച്ച ഒരു വ്യക്തിയ്ക്കുണ്ടാവുന്ന സ്വാഭാവിക രോഗപ്രതിരോധശേഷിയെ ഒമിക്രോണ് വകഭേദത്തിന് മറികടക്കാന് കഴിയും. അതു കൊണ്ടു തന്നെ ഒമിക്രോണ് ബാധിക്കാനുള്ള സാധ്യത കൂടുന്നതെന്നും ലോകാരോഗ്യസംഘടനയുടെ യൂറോപ്പ് കാര്യ റീജണല് ഡയറക്ടര് ഹാന്സ് ഹെന്റി പി. ക്ലൂഗെ പറഞ്ഞു.
മുന് വകഭേദങ്ങളെപ്പോലെതന്നെ ഒമിക്രോണും അപകടകാരിയാണെന്നും അതിനാല് കോവിഡ് വന്നവരടക്കമുള്ളവര് ജാഗ്രത പാലിക്കണമെന്നും വാക്സിനെടുക്കാത്തവര് ഉടന് തന്നെ വാക്സിന് സ്വീകരിക്കണമെന്നും അദ്ദേഹം പറഞ്ഞു
അതേ സമയം രാജ്യത്ത് കോവിഡ് 19 മൂന്നാം തരംഗം രൂക്ഷമാകുന്നു. കഴിഞ്ഞ ദിവസത്തേക്കാള് കോവിഡ് രോഗികളില് 21 ശതമാനം വര്ധനവാണ് ഇന്നുണ്ടായിരിക്കുന്നത്. 1,41,986 പുതിയ കോവിഡ് രോഗികളാണ് ഇന്ന് രാജ്യത്ത് റിപ്പോര്ട്ട് ചെയ്തിരിക്കുന്നത്.
രാജ്യത്ത് കൂടുതല് സംസ്ഥാനങ്ങളില് നിയന്ത്രണങ്ങള് ശക്തമാക്കിയേക്കും. സമ്പൂര്ണ കര്ഫ്യൂ അടക്കമുള്ള നിയന്ത്രണങ്ങള് തീരുമാനിക്കാന് ഡല്ഹി ദുരന്ത നിവാരണ അതോറിറ്റി തിങ്കളാഴ്ച യോഗം ചേരും.