സഭയിലെ കയ്യാങ്കളി ഒരു കാരണവശാലും അംഗീകരിക്കാനാവില്ലെന്ന് സുപ്രീംകോടതി
തിരുവനന്തപുരം: നിയമസഭയില് മാണിക്കെതിരെ നടന്നത് അഴിമതിക്കെതിരെയുള്ള സമരമാണെന്ന് സംസ്ഥാന സര്ക്കാര്.
നിയമസഭാ കൈയാങ്കളിക്കേസ് പിന്വലിക്കാന് അനുവദിക്കണമെന്നാവശ്യപ്പെട്ട് സംസ്ഥാന സര്ക്കാര് നല്കിയ ഹര്ജി പരിഗണിക്കവെയാണ് സംസ്ഥാന സര്ക്കാര് നിലപാട് അറിയിച്ചത്. അഴിമതിക്കെതിരായ പ്രതിഷേധമാണ് നടന്നതെന്നും എം.എല്.എമാര്ക്ക് അതിനുള്ള അവകാശമുണ്ടെന്നും സര്ക്കാര് കോടതിയെ അറിയിച്ചു. കേസ് ബുധനാഴ്ച വീണ്ടും പരിഗണിക്കും.
നിയമസഭാ കൈയാങ്കളി കേസ് പിന്വലിക്കാനുള്ള സര്ക്കാര് തീരുമാനം കേരള ഹൈകോടതി തള്ളിയതിനെതിരെയാണ് സംസ്ഥാന സര്ക്കാര് സുപ്രീംകോടതിയില് അപ്പീല് നല്കിയത്. സ്പീക്കറുടെ അനുമതി ഇല്ലാതെ നിയമസഭാ സെക്രട്ടറി നല്കിയ കേസ് നിലനില്ക്കില്ല എന്ന് സര്ക്കാര് അപ്പീലില് ബോധിപ്പിച്ചിരുന്നു.
2015 മാര്ച്ച് 13ന് ബാര് കോഴ വിവാദം കത്തിനില്ക്കെ ധനമന്ത്രി കെ.എം. മാണിയുടെ ബജറ്റ് അവതരണം തടസ്സപ്പെടുത്താനാണ് നിയസമഭയില് അന്നത്തെ പ്രതിപക്ഷത്തെ ഇടതു എം.എല്.എമാര് അഴിഞ്ഞാടിയത്. പ്രതിപക്ഷം സ്പീക്കറുടെ കസേരടയടക്കം മറിച്ചിട്ടു. മന്ത്രി ശിവന്കുട്ടിക്ക് പുറമെ ഇ.പി. ജയരാജന്, കെ.ടി. ജലീല്, കെ. അജിത്ത് എന്നിവരടക്കമുള്ള എം.എല്.എമാര്ക്കെതിരെ പൊതുമുതല് നശിപ്പിച്ചതടക്കമുള്ള വകുപ്പുകള് ചേര്ത്താണ് കന്റോണ്മെന്റ് പൊലീസ് കേസെടുത്തത്. കേസില് കുറ്റപത്രം സമര്പ്പിച്ചരുന്നെങ്കിലും ഇടത് സര്ക്കാര് അധികാരത്തില് വന്നതോടെ പിന്വലിക്കാന് ശ്രമിക്കുകയായിരുന്നു.