കോവിഡ് മൂന്നാം തരംഗം നേരിടാന് പ്രതിദിനം രണ്ടരലക്ഷം പേര്ക്ക് വാക്സിന്
തിരുവനന്തപുരം: കോവിഡിന്റെ മൂന്നാം തരംഗത്തെ ഫലപ്രദമായി നേരിടുന്നതിന് ആക്ഷന് പ്ലാനുമായി ആരോഗ്യ വകുപ്പ്.
ആശുപത്രികളിലെ ചികിത്സാ സൗകര്യങ്ങള് വര്ധിപ്പിക്കുന്നതിനോടൊപ്പം തന്നെ പരമാവധി ജനങ്ങള്ക്ക് വാക്സിന് നല്കി സുരക്ഷിതമാക്കാന് ശ്രമിക്കണമെന്നും, സ്വകാര്യ ആശുപത്രികളുടെ പങ്കാളിത്തം ഉറപ്പുവരുത്തണമെന്നും മന്ത്രി വീണാ ജോര്ജിന്റെ നേതൃത്വത്തില് ചേര്ന്ന ഉന്നതതല യോഗത്തില് തീരുമാനമായി.
പ്രതിദിനം രണ്ട് മുതല് രണ്ടര ലക്ഷം പേര്ക്ക് വാക്സിന് നല്കുക എന്നതാണ് ലക്ഷ്യം. അതിന് ആവശ്യമായ വാക്സിന് ലഭ്യമാക്കേണ്ടതാണ്. രജിസ്ട്രേഷന് ചെയ്യാന് അറിയാത്ത സാധാരണക്കാര്ക്കായി രജിസ്ട്രേഷന് ഡ്രൈവ് ആരംഭിക്കുന്നതാണ്. ഞായറാഴ്ചകളിലും മറ്റ് അവധി ദിവസങ്ങളിലും വാക്സിന് സുഗമമായി നടത്തണമെന്നും മന്ത്രി നിര്ദേശം നല്കി. നിലവില് കോവിഡിനായി മാറ്റിവച്ചിരിക്കുന്ന കിടക്കകളില് 47 ശതമാനം മാത്രമാണ് രോഗികളുള്ളത്. മൂന്നാം തരംഗം മുന്നില് കണ്ട് സര്ക്കാര് സ്വകാര്യ ആശുപത്രികളില് കൂടുതല് കിടക്കകള് സജ്ജമാക്കുന്നതാണ്. ഓക്സിജന് കിടക്കകള്, ഐ.സി.യു., വെന്റിലേറ്റര് എന്നിവയുടെ എണ്ണം കൂട്ടും. ഓക്സിജന് ക്ഷാമം ഉണ്ടാകാതിരിക്കാന് പ്രതിദിന ഉത്പാദനം 60 മെട്രിക് ടണ് ആക്കി ഉയര്ത്താനാണ് ലക്ഷ്യമിടുന്നത്. അനുവദിച്ച ഓക്സിജന് പ്ലാന്റുകള് എത്രയും വേഗം പൂര്ത്തിയാക്കേണ്ടതാണ്.
മരുന്നുകള്, ഉപകരണങ്ങള്, പരിശോധനാ സാമഗ്രികള്, സുരക്ഷാ ഉപകരണങ്ങള് എന്നിവ നേരത്തെ തന്നെ സംഭരിക്കാന് കെഎംഎസ്സിഎല്ലിന് നിര്ദേശം നല്കിയിട്ടുണ്ട്.മൂന്നാം തരംഗം കുട്ടികളെ കൂടി ബാധിക്കുമെന്ന് കണ്ട് സര്ജ് പ്ലാന് ആരോഗ്യ വകുപ്പ് ആവിഷ്ക്കരിച്ച് നടപ്പിലാക്കി വരുന്നു. മെഡിക്കല് കോളേജുകള്, മറ്റ് സര്ക്കാര് ആശുപത്രികള്, സ്വകാര്യ ആശുപത്രികള് എന്നിവിടങ്ങളില് ചികിത്സാ സൗകര്യങ്ങള് വര്ധിപ്പിക്കും. കഴിഞ്ഞ തിങ്കളാഴ്ച മുതല് പീഡിയാട്രിക് സൗകര്യങ്ങള് ഉയര്ത്തി വരുന്നു. പീഡിയാട്രിക് ഐസിയു കിടക്കകളുടെ എണ്ണം വര്ധിപ്പിക്കാനും മന്ത്രി നിര്ദേശം നല്കി.
കുടുംബത്തിലെ ഒരംഗത്തില് നിന്നും മറ്റുള്ളവരിലേക്ക് പകരുന്നതിനാല് കുടുംബാംഗങ്ങള് വളരെയേറെ ശ്രദ്ധിക്കണം. വീട്ടില് സൗകര്യമില്ലാത്തവരെ കൊവിഡ് കെയര് സെന്ററുകളിലേക്ക് മാറ്റുന്നതാണ്. മരണം കൂടുന്നതിനാല് ഹൈ റിസ്ക് വിഭാഗത്തെ കേന്ദ്രീകരിച്ച് പ്രത്യേക അവബോധം നടത്തുന്നതാണ്. ഇത്തരത്തിലുള്ളവരുടെ വീടുകളില് കൊവിഡ് പോസിറ്റീവായാല് പ്രത്യേകം ശ്രദ്ധിക്കേണ്ടതാണ്.
ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന്. ഖോബ്രഗഡെ, എന്എച്ച്എം. സ്റ്റേറ്റ് മിഷന് ഡയറക്ടര് ഡോ. രത്തന് ഖേല്ക്കര്, കെഎംഎസ്സിഎല് എംഡി ബാലമുരളി, ആരോഗ്യ വകുപ്പ് ഡയറക്ടര് ഡോ. ആര് രമേഷ്, ആരോഗ്യ വിദ്യാഭ്യാസ വകുപ്പ് ഡയറക്ടര് ഡോ. എ റംലബീവി, അഡീഷണല് ഡയറക്ടര്മാര്, ഡെപ്യൂട്ടി ഡയറക്ടര്മാര്, ജില്ലാ മെഡിക്കല് ഓഫീസര്മാര്, ജില്ലാ പ്രോഗ്രാം മാനേജര്മാര്, ജില്ലാ സര്വയലന്സ് ഓഫീസര്മാര് എന്നിവര് യോഗത്തില് പങ്കെടുത്തു.