നേപ്പാള് പാര്ലമെന്റ് പിരിച്ചുവിട്ടു
കാഠ്മണ്ഡു: അധികാര വടംവലി രൂക്ഷമായ നേപ്പാളില് പ്രധാനമന്ത്രി കെ.പി. ശര്മ ഒലിയുടെ ശിപാര്ശയില് പ്രസിഡന്റ് ബിദ്യ ദേവി ഭണ്ഡാരി പാര്ലമെന്റ് പിരിച്ചുവിട്ടു. ഭരണകക്ഷിയായ നേപ്പാള് കമ്യൂണിസ്റ്റ് പാര്ട്ടിക്കുള്ളില് ഒലിയും മുന് പ്രധാനമന്ത്രി പ്രചണ്ഡയും തമ്മിലുള്ള അധികാരത്തര്ക്കം രൂക്ഷമായതാണ് പുതിയ സംഭവ വികാസങ്ങള്ക്ക് പിറകില്.
ഞായറാഴ്ച രാവിലെ പ്രധാനമന്ത്രിയുടെ അധ്യക്ഷതയില് ചേര്ന്ന നേപ്പാള് മന്ത്രിസഭ യോഗമാണ് പാര്ലമെന്റ് പിരിച്ചുവിടണമെന്ന നിര്ദേശം മുന്നോട്ടുവെച്ചത്. തുടര്ന്ന് ഒലി നേരിട്ട് പ്രസിഡന്റിനെ കണ്ട് ഇക്കാര്യം അറിയിക്കുകയായിരുന്നു.
പാര്ലമെന്റ് പിരിച്ചുവിട്ട പ്രസിഡന്റ് ഏപ്രില്-മേയ് മാസങ്ങളിലായി ഇടക്കാല തെരഞ്ഞെടുപ്പ് പ്രഖ്യാപിച്ചിട്ടുണ്ട്. ഒന്നാംഘട്ട തെരഞ്ഞെടുപ്പ് ഏപ്രില് 30നും രണ്ടാം ഘട്ടം മേയ് 10നുമാണ് നടക്കുകയെന്ന് നേപ്പാള് രാഷ്ട്രപതി ഭവന് അറിയിച്ചു. അഞ്ചുവര്ഷ കാലവധിയുള്ള 207 അംഗ പാര്ലമെന്റിലേക്ക് 2017ലാണ് തെരഞ്ഞെടുപ്പ് നടന്നത്.
അതേസമയം, ഒലിയുടെ നടപടിക്കെതിരെ ഭരണകക്ഷിയില്നിന്നുതന്നെ എതിര്പ്പുയര്ന്നു. നടപടി ജനാധിപത്യ-ഭരണഘടന വിരുദ്ധവും ഏകാധിപത്യവുമാണെന്ന് നേപ്പാള് കമ്യൂണിസ്റ്റ് പാര്ട്ടി (എന്.സി.പി) വക്താവ് നാരായണ്കജി ശ്രേഷ്ഠ പറഞ്ഞു. വിഷയം ചര്ച്ചചെയ്യാന് പാര്ട്ടിയുടെ സ്റ്റാന്ഡിങ് കമ്മിറ്റി ചേരുമെന്നും അദ്ദേഹം പറഞ്ഞു. മുന് പ്രധാനമന്ത്രിയും മുതിര്ന്ന എന്.സി.പി നേതാവുമായ മാധവ് കുമാര് നേപ്പാളും നടപടിക്കെതിരെ രംഗത്തെത്തി. പ്രശ്നം ചര്ച്ചചെയ്യാന് നേതാക്കള് പ്രചണ്ഡയുടെ വസതിയില് ഒത്തുചേര്ന്നിട്ടുണ്ട്.