കേന്ദ്ര സർക്കാർ യുവജനങ്ങളുടെ ഭാവി കവർന്നെടുത്തു: രാഹുൽ ഗാന്ധി
ന്യൂഡല്‍ഹി: കേന്ദ്രസർക്കാരിനെതിരെ വീണ്ടും വിമർശനവുമായി രാഹുൽ ഗാന്ധി.
സർക്കാർ തസ്തികകളിൽ നിയമനനിരോധനം ഏർപ്പെടുത്തുമെന്ന റിപ്പോർട്ടുകളെ അപലപിച്ചാണു രാഹുലിന്‍റെ ട്വീറ്റ്. ധനകാര്യ വിഭാഗത്തിന്‍റെ അനുമതിയില്ലാതെ പുതിയ പദവികൾ സൃഷ്ടിക്കരുതെന്നുള്ള കേന്ദ്ര സര്‍ക്കാര്‍ ഉത്തരവും ചൂണ്ടിക്കാട്ടിയാണ് രാഹുലിന്‍റെ വിമര്‍ശനം.
കേന്ദ്ര സർക്കാർ പുതിയ തസ്തികകൾ സൃഷ്ടിക്കുന്നതു മരവിപ്പിക്കുകയാണ്. കോവിഡിന്റെ പേരിൽ സർക്കാർ ഒഴിവുകഴിവു പറയുകയാണ്. യുവജനങ്ങളുടെ ഭാവി കവർന്നെടുത്തു. ബി.ജെ.പി സർക്കാരിന്‍റെ അടുപ്പക്കാരെ മുന്നോട്ടുകൊണ്ടുവരിക മാത്രമാണു കേന്ദ്ര സർക്കാരിന്‍റെ ലക്ഷ്യമെന്നും രാഹുൽ കുറ്റപ്പെടുത്തി. കുറച്ചു ഭരണം, കൂടുതൽ സ്വകാര്യവത്ക്കരണം എന്നതാണു മോദി സർക്കാരിന്‍റെ ചിന്തയെന്നും നിയമനം മരവിപ്പിച്ച മാധ്യമ റിപ്പോർട്ട് പങ്കുവച്ചുകൊണ്ടു രാഹുൽ കുറ്റപ്പെടുത്തി.