കോട്ടയത്ത് നാലു പഞ്ചായത്തുകള്‍ കൂടി ഹോട്ട്സ്പോട്ടുകള്
കോട്ടയം: ജില്ലയില്‍ നാലു പഞ്ചായത്തുകള്‍ കൂടി കോവിഡ് ഹോട്ട് സ്‌പോട്ടുകളായി പ്രഖ്യാപിച്ചു. അയ്മനം, അയര്‍ക്കുന്നം, വെളളൂര്‍, തലയോലപ്പറമ്ബ് പഞ്ചായത്തുകളാണ് പുതിയ ഹോട്ട്സ്പോട്ടുകള്. നേരത്തെ വിജയപുരം, പനച്ചിക്കാട്, മണര്‍കാട് പഞ്ചായത്തുകളും കോട്ടയം മുനിസിപ്പാലിറ്റിയിലെ അഞ്ച് വാര്‍ഡുകളും ഹോട്ട് സ്‌പോട്ടായി പ്രഖ്യാപിച്ചിരുന്നു.
ഹോട്ട് സ്പോട്ടുകളില്‍ ആരോഗ്യം, ഭക്ഷണ വിതരണം എന്നീ മേഖലകളുമായി ബന്ധപ്പെട്ട പ്രവര്‍ത്തനങ്ങള്‍ക്കും സ്ഥാപനങ്ങള്‍ക്കും മാത്രമേ അനുമതിയുള്ളൂ. കോവിഡ്-19 സ്ഥിരീകരിച്ചവരുടെ വീടുകള്‍ സ്ഥിതി ചെയ്യുന്ന മേഖലകള്‍ കണ്ടെയ്ന്‍മെന്‍റ് സോണുകളായി നിര്‍ണയിച്ചിട്ടുണ്ട്. ഇവിടെ കര്‍ശന നിയന്ത്രണം ഉണ്ടാകും. ഇത്തരം മേഖലകളില്‍ ഭക്ഷണ വിതരണത്തിന് തദ്ദേശഭരണ സ്ഥാപനങ്ങളും പോലീസും ചേര്‍ന്ന് ക്രമീകരണം ഏര്‍പ്പെടുത്തും.
കോട്ടയത്ത് കൂടുതല്‍ പേര്‍ക്ക് കോവിഡ് രോഗം സ്ഥിരീകരിച്ചതോടെയാണ് ഹോട്ട്സ്പോര്‍ട്ടുകളുടെ എണ്ണം വര്‍ധിപ്പിച്ചത്. ഞായറാഴ്ച അഞ്ചു പേര്‍ക്കു കൂടി കോവിഡ് -19 സ്ഥിരീകരിച്ചു. ഇതില്‍ ഒരാള്‍ ആരോഗ്യ പ്രവര്‍ത്തകയും ഒരാള്‍ തമിഴ്‌നാട് സ്വദേശിയുമാണ്. ഇതോടെ ജില്ലയിയില്‍ ചികിത്സയിലുള്ള രോഗബാധിതരുടെ എണ്ണം 11 ആയി ഉയര്‍ന്നു.
രോഗം സ്ഥിരീകരിച്ച വടയാര്‍ സ്വദേശിക്ക്(53) വിദേശത്തു നിന്നെത്തിയ ബന്ധുക്കളുമായി സമ്ബര്‍ക്കമുണ്ടെന്നാണ് പ്രാഥമിക വിവരം. പനിയെത്തുടര്‍ന്ന് ചികിത്സ തേടുകയായിരുന്നു. ഒളശ സ്വദേശിയായ ആരോഗ്യപ്രവര്‍ത്തകന്‍ (32). ചുമയെത്തുടര്‍ന്ന് പരിശോധനയ്ക്ക് വിധേയനാവുകയായിരുന്നു. പരിശോധനയിലാണ് രോഗം സ്ഥരീകരിച്ചത്. ചാന്നാനിക്കാട് സ്വദിശിനിയായ ബിരുദാനന്തര ബിരുദ വിദ്യാര്‍ഥിനി(25) രണ്ടാഴ്ച്ചയായി ചുമ തുടരുന്ന സാഹചര്യത്തില്‍ ചികിത്സ തേടിയപ്പോഴാണ് കോവിഡ് സ്ഥിരീകരിച്ചത്.