സ്വര്ണക്കടത്ത് കേസില് ഇഡി ഉദ്യോഗസ്ഥര്ക്കെതിരായ ജുഡീഷ്യല് അന്വേഷണം ഹൈക്കോടതി സ്റ്റേ ചെയ്തു
തിരുവനന്തപുരം: സ്വര്ണ്ണക്കടത്തു കേസില് സംസ്ഥാന സര്ക്കാറിന് തിരിച്ചടി. സ്വര്ണക്കടത്ത് കേസ് അന്വേഷിച്ച ഉദ്യോഗസ്ഥര്ക്കെതിരേ ജുഡീഷ്യല് അന്വേഷണം നടത്താനുള്ള സംസ്ഥാന സര്ക്കാരിന്റെ തീരുമാനത്തെ ചോദ്യംചെയ്ത് എന്ഫോഴ്സ്മെന്റ് ഡയറക്ടറേറ്റ് നല്കിയ ഹരജിയില് അന്വേഷണത്തിന് ഇടക്കാല സ്റ്റേ അനുവദിച്ചു.
ജുഡീഷ്യല് അന്വേഷണം റദ്ദാക്കണമെന്നാവശ്യപ്പെട്ടാണ് ഇഡി ഹൈക്കോടതിയെ സമീപിച്ചിരുന്നത്. ഈ ഹര്ജി കോടതി ഫയലില് സ്വീകരിച്ചു. കേസില് വിശദമായ അന്വേഷണം കേള്ക്കുന്നതിന്റെ ഭാഗമായാണ് സ്റ്റേ അനുവദിച്ചത്.
അന്വേഷണത്തിനെതിരായ ഇഡിയുടെ ഹര്ജി ഫയലില് സ്വീകരിച്ച കോടതി വിശദമായ വാദം പിന്നീട് കേള്ക്കുമെന്നും അറിയിച്ചു. മറ്റ് കക്ഷികള്ക്കും നോട്ടീസ് അയക്കും.
1952 ലെ കമ്മീഷന് ഓഫ് എന്ക്വയറീസ് ആക്ട് പ്രകാരം കേന്ദ്ര ഏജന്സികള്ക്കെതിരേ അന്വേഷണ കമ്മീഷനെ നിയമിക്കാന് സംസ്ഥാന സര്ക്കാരിന് അധികാരമില്ലെന്നാണ് ഇഡി പ്രധാനമായും ഹര്ജിയില് ചൂണ്ടിക്കാട്ടി.