കോവിഡ് ബാധിച്ച് മരിച്ചവരുടെ ലിസ്റ്റില് പരാതിയുണ്ടെങ്കില് പരിശോധിക്കുമെന്ന് ആരോഗ്യമന്ത്രി
തിരുവനന്തപുരം: സംസ്ഥാനത്ത് കോവിഡ് ബാധിച്ച് മരിച്ചവരുടെ ലിസ്റ്റില് പരാതിയുണ്ടെങ്കില് പരിശോധിക്കുമെന്ന് ആരോഗ്യമന്ത്രി വീണ ജോര്ജ്. നിലവിലെ പട്ടിക സര്ക്കാര് പ്രസിദ്ധീകരിക്കുമെന്നും മന്ത്രി നിയമസഭയില് പറഞ്ഞു.
ഇതുസംബന്ധിച്ച് പരാതികള് സ്വീകരിച്ചിട്ടുണ്ടെങ്കിലും വളരെ കുറവാണ്. അതിനാല് ആരോഗ്യവകുപ്പ് തന്നെ പരിശോധന നടത്തുന്നുണ്ട്. പട്ടികയില് ഉള്പ്പെടാത്ത കോവിഡ് മരണങ്ങളുണ്ടെങ്കില് അത് പ്രസിദ്ധീകരിക്കുന്നതില് ആരോഗ്യവകുപ്പിന് യാതൊരു മടിയുമില്ലെന്നും വീണ ജോര്ജ് പറഞ്ഞു.
കോവിഡ് ബാധിച്ച് മരിച്ചവരുടെ പട്ടിക സര്ക്കാര് പ്രസിദ്ധീകരിച്ചില്ലെന്ന പ്രതിപക്ഷ നേതാവിന്റെ ആരോപണത്തിന് സഭയില് മറുപടി പറയുകയായിരുന്നു മന്ത്രി. കോവിഡ് മൂലം മരിച്ചവരുടെ പേര് പട്ടികയിലില്ലെന്നും കേന്ദ്രം സഹായം പ്രഖ്യാപിച്ചാല് പലര്ക്കും കിട്ടില്ലെന്നുമായിരുന്നു പ്രതിപക്ഷ നേതാവ് വി.ഡി സതീശന് നിയമസഭയില് പറഞ്ഞത്.