ശൗചാലയങ്ങള്ക്ക് അയ്യങ്കാളിയുടെ പേരുനല്കുന്നുവെന്നത് നുണപ്രചരണം: മന്ത്രി
തിരുവനന്തപുരം : തദ്ദേശ സ്വയംഭരണ വകുപ്പ് ദേശീയ- സംസ്ഥാന പാതയോരങ്ങളില് നടപ്പിലാക്കുന്ന ടേക് എ ബ്രേക്ക് പദ്ധതിയുമായി ബന്ധപ്പെട്ട് ജാതീയമായ സ്പര്ധയും സര്ക്കാര് വിരുദ്ധ വികാരവും വളര്ത്തിയെടുക്കാന് ചില നിക്ഷിപ്ത കേന്ദ്രങ്ങള് നടത്തുന്ന ശ്രമം ജനങ്ങള് തിരിച്ചറിയണമെന്ന് തദ്ദേശ സ്വയംഭരണ മന്ത്രിയുടെ ഓഫീസ് അഭ്യര്ത്ഥിച്ചു.
പാതയോര വിശ്രമ കേന്ദ്രങ്ങള്ക്ക് സര്ക്കാര് നല്കിയിട്ടുള്ള പേര് ടേക് എ ബ്രേക്ക് എന്നാണ്. അതിന് നവോത്ഥാന നായകനായ അയ്യങ്കാളിയുടെ പേര് നല്കി അപമാനിച്ചു എന്ന നുണ പ്രചരിപ്പിച്ചാണ് ചില സംഘടനകളും രാഷ്ട്രീയ പാര്ട്ടികളും മുതലെടുപ്പിന് ശ്രമിക്കുന്നത്. റോഡ് യാത്രക്കാര്ക്ക് പ്രാഥമിക കൃത്യങ്ങള് നിര്വ്വഹിക്കാനും വിശ്രമിക്കാനും വേണ്ടിയുള്ളതാണ് ടേക് എ ബ്രേക്കില് ഒരുക്കുന്ന ശുചിമുറികളും അനുബന്ധ സൗകര്യങ്ങളുമെന്നും മന്ത്രിയുടെ ഓഫീസ് പുറത്തിറക്കിയ വാര്ത്താക്കുറിപ്പില് ചൂണ്ടിക്കാട്ടി.