സന്നിധാനത്തുനിന്ന് ഞായറാഴ്ച രാത്രി അറസ്റ്റ് ചെയ്ത 69 പേരെ 14 ദിവസത്തേക്ക് റിമാന്ഡ് ചെയ്തു
പത്തനംതിട്ട: സന്നിധാനത്തുനിന്ന് ഞായറാഴ്ച രാത്രി അറസ്റ്റ് ചെയ്ത 69 പേരെ 14 ദിവസത്തേക്ക് റിമാന്ഡ് ചെയ്തു. ഇവരുടെ ജാമ്യാപേക്ഷ 21ന് പരിഗണിക്കുമെന്ന് പത്തനംതിട്ട കോടതി അറിയിച്ചു. റിമാന്ഡ് ചെയ്തവരെ പൂജപ്പുര സെന്ട്രല് ജയിലിലേക്കു കൊണ്ടുപോകും. ബിജെപി സംസ്ഥാന ജനറല് സെക്രട്ടറി കെ. സുരേന്ദ്രന്റെ ജാമ്യാപേക്ഷയും മറ്റന്നാള് പരിഗണിക്കുമെന്ന് പത്തനംതിട്ട മുന്സിഫ് കോടതി അറിയിച്ചു.
70 പേരെയാണു ഞായറാഴ്ച രാത്രി ഏറെ വൈകി അറസ്റ്റ് ചെയ്തത്. പിടിയിലായവരെ പത്തനംതിട്ട മുന്സിഫ് കോടതിയില് ഹാജരാക്കി. ഞായറാഴ്ച രാത്രി വൈകി സന്നിധാനത്തു നാമജപപ്രതിഷേധം സംഘടിപ്പിച്ചവരെ പൊലീസ് അറസ്റ്റ് ചെയ്തു നീക്കുകയായിരുന്നു. മാളികപ്പുറത്തു വിരിവയ്ക്കാന് അനുവദിക്കാതെ പൊലീസ് ഭക്തരെ തടഞ്ഞതിനെ തുടര്ന്നാണു രാത്രി പ്രതിഷേധം നടന്നത്. ഹരിവരാസനം പാടി നടയടച്ചതിനു ശേഷവും പ്രതിഷേധം തുടര്ന്നതോടെയാണ് ഇവരെ പൊലീസ് ബലം പ്രയോഗിച്ചു നീക്കിയത്. നെയ്യഭിഷേകം നടത്തിയ ശേഷം അറസ്റ്റിന് വഴങ്ങാമെന്നു പ്രതിഷേധക്കാര് നിലപാടെടുത്തെങ്കിലും ഇത് അംഗീകരിക്കാന് പൊലീസ് തയാറായില്ല