സിദ്ദിഖ് കാപ്പന്റെ മെഡിക്കല് റിപ്പോര്ട്ട് ഹാജരാക്കാന് സുപ്രീംകോടതി നിര്ദ്ദേശം
ന്യൂഡല്ഹി:ഉത്തര്പ്രദേശില് യുഎപിഎ കേസില് ജയിലില് കഴിയവെ കോവിഡ് ബാധിതനായ മലയാളി മാധ്യമ പ്രവര്ത്തകന് സിദ്ദിഖ് കാപ്പന്റെ മെഡിക്കല് റിപ്പോര്ട്ട് ഹാജരാക്കാന് സുപ്രീം കോടതി നിര്ദേശം. സിദ്ദിഖ് കാപ്പനെ ചികിത്സയ്ക്കായി ഡല്ഹി എയിംസിലേക്ക് മാറ്റണമെന്ന ഹര്ജിയിലാണ് കോടതി നിര്ദേശം. ഹര്ജി പരിഗണിക്കുന്നത് കോടതി നാളത്തേക്ക് മാറ്റി.
20-ാം തീയതി കോവിഡ് സ്ഥിരീകരിച്ച കാപ്പനെ മഥുരയിലെ കൃഷ്ണ മോഹന് മെഡിക്കല് കോളജില് പ്രവേശിപ്പിച്ചിരിക്കുകയാണ്.
കാപ്പനെ ആശുപത്രിയില് ചങ്ങലയ്ക്ക് ഇട്ടിരിക്കുകയാണെന്ന് കേരള പത്രപ്രവര്ത്തക യൂണിയന് അഭിഭാഷകന് വില്സ് മാത്യു കോടതിയെ അറിയിച്ചു.
എന്നാല് ഉത്തര്പ്രദേശ് സര്ക്കാരിന് വേണ്ടി ഹാജരായ സോളിസിറ്റര് ജനറല് തുഷാര് മേത്ത ഈ ആരോപണം നിഷേധിച്ചു. തുടര്ന്നാണ് കാപ്പന്റെ മെഡിക്കല് റിപ്പോര്ട്ട് ഹാജരാക്കാന് കോടതി നിര്ദേശിച്ചത്.