ജഡ്ജി പിന്മാറി; മഅ്ദനിയുടെ ഹരജി അടുത്തയാഴ്ച പുതിയ ബെഞ്ച് പരിഗണിക്കും
ന്യൂഡല്‍ഹി: പി.ഡി.പി ചെയര്‍മാന്‍ അബ്ദുന്നാസിര്‍ മഅ്ദനി ജാമ്യ വ്യവസ്ഥയില്‍ ഇളവ് തേടി സമര്‍പ്പിച്ച ഹരജി പരിഗണിക്കുന്ന സുപ്രീംകോടതി ബെഞ്ചിലെ ജഡ്ജിമാരിലൊരാള്‍ പിന്മാറി. മഅ്ദനിയെ കുറ്റവിമുക്തനാക്കിയ കോയമ്ബത്തൂര്‍ സ്ഫോടന കേസില്‍ അദ്ദേഹത്തിന് വേണ്ടി ഹാജരായിട്ടുണ്ടെന്ന് ചൂണ്ടിക്കാട്ടി ജസ്റ്റിസ് വി. രാമസുബ്രമണ്യമാണ് പിന്‍മാറിയത്. ഇതോടെ ഹരജി പുതിയ ബെഞ്ച് പരിഗണിക്കും.
2003ല്‍ കോയമ്ബത്തൂര്‍ സ്ഫോടന കേസില്‍ അഭിഭാഷകന്‍ എന്ന നിലയില്‍ മഅ്ദനിക്ക് വേണ്ടി ഒന്നില്‍ കൂടുതല്‍ തവണ മദ്രാസ് ഹൈകോടതിയില്‍ ഹാജരായിട്ടുണ്ടെന്ന് വ്യക്തമാക്കിയ ജസ്റ്റിസ് രാമസുബ്രമണ്യം വാദം കേള്‍ക്കുന്നതില്‍ പിന്‍മാറുകയാണെന്ന് അറിയിക്കുകയായിരുന്നു. ഇതേ തുടര്‍ന്ന് മഅദനിയുടെ അപേക്ഷ പുതിയ ബെഞ്ചിന് മുമ്ബാകെ ലിസ്റ്റ് ചെയ്യാനും അടുത്തയാഴ്ച പരിഗണിക്കാനും ചീഫ് ജസ്റ്റിസ് എസ്.എ. ബോബ്‌ഡെ നിര്‍ദേശിച്ചു.
അതേസമയം, മഅ്ദനിക്ക് ജാമ്യ വ്യവസ്ഥയില്‍ ഇളവ് നല്‍കരുതെന്ന് ആവശ്യപ്പെട്ട് കര്‍ണാടക സര്‍ക്കാര്‍ സുപ്രീംകോടതിയില്‍ സത്യവാങ്മൂലം ഫയല്‍ ചെയ്തു. ജാമ്യവ്യവസ്ഥയില്‍ ഇളവ് അനുവദിക്കുന്നത് രാജ്യത്തിെന്‍റ സമാധാനത്തെ പ്രതികൂലമായി ബാധിക്കും. ഇളവ് നല്‍കി കേരളത്തില്‍ പോകാന്‍ അനുവദിച്ചാല്‍ വീണ്ടും ഭീകരവാദപ്രവര്‍ത്തനങ്ങളില്‍ ഏര്‍പ്പെടുമെന്നും സത്യവാങ്മൂലത്തില്‍ പറയുന്നു.