മാണിയോട് സി.പി.എം ചെയ്ത ക്രൂരത ജോസ് കെ.മാണി മറന്നാലും ജനങ്ങള് മറക്കില്ലെന്ന് ഉമ്മന്ചാണ്ടി
കോട്ടയം: കെ.എം. മാണിയോട് സി.പി.എം ചെയ്ത ക്രൂരത ജോസ് കെ.മാണി മറന്നാലും അദ്ദേഹത്തെ സ്നേഹിക്കുന്ന ജനങ്ങള് മറക്കില്ലെന്ന് മുന്മുഖ്യമന്ത്രി ഉമ്മന്ചാണ്ടി. മാണിക്കെതിരായി ഇടതുപക്ഷം എന്തൊക്കെ ആക്ഷേപങ്ങള് ഉന്നയിച്ചു. അദ്ദേഹം ഒരു തെറ്റും ചെയ്തതായി തങ്ങള് വിശ്വസിക്കുന്നില്ല. അദ്ദേഹത്തിന് ക്ലീന് ചിറ്റാണ് യു.ഡി.എഫ് കൊടുത്തതെന്നും അദ്ദേഹം പറഞ്ഞു.
ശബരിമല പ്രശ്നത്തില് കേന്ദ്രം ഭരിക്കുന്ന ബി.ജെ.പി നിയമം കൊണ്ടുവരാന് ശ്രമിക്കാതെ കാഴ്ചക്കാരായി നില്ക്കുകയായിരുന്നു. സംസ്ഥാന സര്ക്കാര് പ്രശ്നം രൂക്ഷമാക്കാനാണ് ശ്രമിച്ചത്. വീട്ടില് നിന്ന് സ്ത്രീകളെ വേഷം മാറ്റി ശബരിമലയില് എത്തിക്കുകയാണ് സര്ക്കാര് ചെയ്തത്. സുപ്രീംകോടതി വിധി അതുപോലെ തന്നെ നില്ക്കുകയല്ലേ, ഇപ്പോള് ശബരിമലയില് ഒരു പ്രശ്നവുമില്ലല്ലോ. പൊലീസിനെ വിട്ട് ബലം പ്രയോഗിച്ച് സ്ത്രീകളെ ശബരിമലയിലെത്തിക്കാനുള്ള ശ്രമം സര്ക്കാര് ഉപേക്ഷിച്ചപ്പോള് അവിടെ സമാധാനം കൈവന്നുവെന്നും അദ്ദേഹം പറഞ്ഞു.