നിര്‍ഭയ ഹോമുകള്‍ സര്‍ക്കാര്‍ പൂട്ടാനൊരുങ്ങുന്നു
തിരുവനന്തപുരം : സംസ്ഥാനത്തെ വിവിധ ജില്ലകളിലായി പ്രവര്‍ത്തിക്കുന്ന 13 നിര്‍ഭയ ഹോമുകള്‍ സര്‍ക്കാര്‍ പൂട്ടാനൊരുങ്ങുന്നു . ഈ നിര്‍ഭയ ഹോമുകളില്‍ കഴിയുന്ന കുട്ടികളെ തൃശൂര്‍ ജില്ലയിലെ പുതിയ കേന്ദ്രത്തിലേക്കു മാറ്റാനാണ് സര്‍ക്കാര്‍ തയ്യാറെടുക്കുന്നത് .
ഇതോടെ പോക്സോ കേസ് ഇരകളുടെ പുരനധിവാസം പ്രതിസന്ധിയിലാകും . സംസ്ഥാനത്ത് പോക്സോ കേസ് ഇരകളെ സംസ്ഥാനത്തെ 14 വിമന്‍ ആന്‍ഡ് ചൈല്‍ഡ് ഹോമുകളിലായാണ് താമസിപ്പിക്കുന്നത്. എന്നാല്‍ ഇനിമുതല്‍ 10നും 18നും ഇടയില്‍ പ്രായമുള്ള അന്തേവാസികളെ തൃശൂരിലെ കേന്ദ്രത്തിലേക്കു മാറ്റുന്നതിനാണ് വനിതാ ശിശുക്ഷേമ വകുപ്പ് തയാറെടുക്കുന്നത്.
അതേസമയം നിര്‍ഭയ ഹോമുകളിലെ താമസക്കാരെ മാറ്റുക മാത്രമാണ് സര്‍ക്കാര്‍ ചെയ്യുന്നതെന്നു വനിത ശിശുവികസന മന്ത്രി കെ.കെ. ശൈലജ വ്യക്തമാക്കി .
തൃശൂരില്‍ 200 പേര്‍ക്ക് താമസിക്കാന്‍ കഴിയുന്ന മാതൃകാ ഹോമാണ് തയ്യാറാക്കിയിട്ടുള്ളത്. നിര്‍ഭയ ഷെല്‍ട്ടര്‍ ഹോമുകളില്‍ താമസിക്കുന്ന പഠിക്കാന്‍ താത്പര്യമുള്ള കുട്ടികള്‍ക്ക് വേണ്ടി മികച്ച ശാസ്ത്രീയമായ സൗകര്യം ഒരുക്കുന്നതിന് വേണ്ടിയാണ് തൃശൂരില്‍ പുതിയ മാതൃക ഹോം സ്ഥാപിച്ചത്. നിലവില്‍ സംസ്ഥാനത്തെ നിര്‍ഭയ ഹോമുകളെല്ലാം എന്‍ജിഒകളുടെ കീഴിലാണ് പ്രവര്‍ത്തിക്കുന്നത്.
കുട്ടികളും മുതിര്‍ന്നവരും ഒപ്പം 350 ഓളം താമസക്കാരുമാണ് നിര്‍ഭയ ഹോമുകളില്‍ കഴിയുന്നത് . ഈ ഹോമുകള്‍ പ്രവര്‍ത്തിക്കുന്നത് വാടക കെട്ടിടത്തിലാണ് . ജനസാന്ദ്രതയുള്ള പ്രദേശത്താണ് ഈ ഹോമുകള്‍ പ്രവര്‍ത്തിക്കുന്നത് എന്നതിനാല്‍ കുട്ടികളെ അപായപ്പെടുത്താനോ വശീകരിച്ച്‌ പ്രതികള്‍ക്ക് അനുകൂലമാക്കാനോയുള്ള ശ്രമങ്ങള്‍ നടക്കാറുണ്ട് .
ഈ കുട്ടികള്‍ക്ക് കെട്ടിടത്തിനുള്ളില്‍ തന്നെ ഒതുങ്ങിക്കഴിയേണ്ട സാഹചര്യമാണ് ഉള്ളത് . ഒരു മുറിയില്‍ പല തരത്തിലുള്ള ആളുകളാണ് കഴിയുന്നത് . ഇവരെ ശാസ്ത്രീയമായി മാറ്റി പുനരധിവസിപ്പിക്കുകയാണ് വനിത ശിശുവികസന വകുപ്പ് ലക്ഷ്യമിടുന്നതെന്നും മന്ത്രി കൂട്ടിച്ചേര്‍ത്തു .